Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 212 Hüküm no: 185 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan’ın Dino v. Yuvan’ı öldürdüğünü itiraf ettiğini fakat kısas davasına vasinin taraf olamayacağı Kısâs. Fi’l-asl vilâyet-i Rumeli’de Servi kazâsına tâbi‘ Tetevon nâm karye ahâlîsinden olup Mahmiye-i İstanbul’da Yedikule dâhilinde Kürkçübaşı Hüseyinağa Mahallesi’nde katîlen hâlik olan celeb tâifesinden Dino v. Yuvan v. Bofço’nun verâseti zevcesi Ustoyo? bt. Yuvan nâm Nasrâniye ile babası mezbûr Yuvan nâm zimmîye ve sagīr oğlu Yuvan ve sagīre kızı Dino’ya münhasıra olduğu lede’ş-şer‘ zâhir oldukdan sonra hâlik-i mezbûrun li-ebeveyn er karındaşı ve sagīrân-ı mezbûrânın kıbel-i şer‘den mansûb vasîleri olan işbu râfi‘u’s-sifr Niko nâm zimmî meclis-i şer‘-i şerîf-i enverde mahalle-i mezbûre sükkânından Hasan b. Ali nâm kimesne mahzarında bi’l-vesâye üzerine da‘vâ ve takrîr-i kelâm edip mezbûr Hasan karındaşım hâlik-i mezbûr Dino’yu târih-i kitâbdan altı gün mukaddem kendi menzilinde gece ile bi-gayr-ı hakkın zebh ve katl etmekle mezbûr Hasan’a suâl olunup mûceb-i şer‘îsi icrâ olunmak bi’l-vesâye matlûbumdur dedikde gıbbe’s-suâl mezbûr Hasan cevâbında fi’l-hakīka kaziyye vasiyy-i merkūm Nikola’nın takrîri üzere olup hâlik-i mezbûr Dino’yu kendi menzilinde gece ile bi-gayr-ı hakkın zebh ve katl eyledeğini meclis-i şer‘de ikrâr u i‘tirâf etmeğin alâ-mûceb-i i‘tirâfihi mûcebince mezbûr Hasan’a şer‘an kısâs lâzım gelip lâkin vasî talebiyle da‘vâ-yı kısâs meşrû‘ olmayıp katîl-i mezbûrun veresesinden babası mezbûr Yuvan diyâr-ı âharda olup da‘vâ-yı kısâs istîfâsında babası mezbûr Yovan’ın huzûruna tevkīf-birle mâ-vaka‘a bi’t-taleb ketb olundu. Fî 22 Cumâdelûlâ sene [1]143. Şuhûdü’l-hâl: Ali Beşe b. Abdullah, Hasan Çelebi b. Abdullah, Abdullah Çavuş b. Süleyman, Mustafa b. Mehmed, Ali b. Mustafa, Mehmed b. Ahmed, Süleyman Çelebi b. Mustafa, Mehmed b. İbrahim, Mehmed Çelebi b. Ahmed, es-Seyyid Ali Çelebi b. es-Seyyid Murtaza, Veli Beşe b. Mustafa, Ahmed b. Hasan, Abdurrahman Beşe b. Abdulkādir, İbrahim b. Mustafa, el-Hâc Ali b. Abdullah, Molla Mehmed b. İbrahim, Mehmed b. Halil.