Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 158 Hüküm no: 152 Orijinal metin no: [15b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Halil’in borçları için kızı Ayşe Hâtun’a açılan alacak davaları Attâr Hüsrev b. Abdullah bundan akdem fevt olan Halil’in kızı Ayşe Hâtun tarafından şer‘le vekâleti sâbite olan Mehmed b. Mustafa mahzarında iki bin altı yüz akçe taleb edip gıbbe’l-inkâr ve’l-istişhâd Ali Çelebi b. Mahmud ve İbrahim Çelebi b. Halil şehâdetleriyle meblağ-ı mezbûr hükm olunup ve Hatice Hâtun bt. İbrahim vekîl-i mezbûrdan iki bin akçe da‘vâ edip gıbbe’l-inkâr ve’l-istişhâd şâhidân-ı mezbûrân şehâdetleriyle meblağ-ı mezbûr hükm olunup Hüseyin b. Mehmed vekîl-i mezbûrdan bin beş yüz akçe da‘vâ edip gıbbe’l-inkâr ve’l-istişhâd Hasan b. Ali ve Ali b. Mahmud şehâdetleriyle meblağ-ı mezbûra hükm olunup ve Emine Hâtun bt. Hızır vekîl-i mezbûrdan iki bin akçe da‘vâ edip gıbbe’l-inkâr ve’l-istişhâd İbrahim Çelebi b. Halil ve Ali b. Mehmed şehâdetleriyle meblağ-ı mezbûr hükm olunup ve Emine Hâtun eytâmına vasî olan Mahmud Bey b. Abdullah dahi vekîl-i mezbûrdan bin altı yüz akçe da‘vâ edip ba‘de’l-inkâr ve’l-istişhâd Ali Çelebi b. Mahmud ve Sinan Bey b. Abdullah şehâdetleriyle hükm olunup cümle hükm olunan dokuz bin sekiz yüz akçe alâ vukû‘ihi mezbûr vekîl talebiyle tahrîr olunup yedine vaz‘ u def‘ olundu ki inde kıyâmi’l-hâce müzekkir-i mâ-cerâ ola. Tahrîren fi’t-târihi’l-mezbûr. Şuhûdü’l-hâl: Muttalib b. Süleyman, Mehmed b. Habîb, Mehmed b. Behrâm, Sefer b. Abdullah, Hasan b. Sâdık, el-Hâc Hüseyin b. Behrâm