Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 212 Hüküm no: 186 Orijinal metin no: [40a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mehmed ile eşi Mustafa b. Ali’nin muhala‘a yoluyla boşandıkları Muhâla‘a. Mahmiye-i İstanbul’da İbrahimpaşa Mahallesi sâkinelerinden olup zâtı Mehmed b. Receb ve Hüseyin b. Abdullah nâm kimesneler ta‘rîfleriyle mu‘arrefe olan Fâtıma bt. Mehmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Mustafa b. Ali nâm kimesne mahzarında ikrâr ve takrîr-i kelâm edip mezbûr Mustafa zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh olan dört bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevc-i mezbûr ile muhâla‘a-i sahîha-i şer‘iyye ile muhâla‘a eylediğimde ol dahi hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 Cumâdelûlâ sene [1]143. Şuhûdü’l-hâl: Ebûbekir b. Mustafa, Hüseyin b. Mehmed, Mehmed b. Receb, Mustafa b. Ahmed.