Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 213 Hüküm no: 188 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahman Odabaşı b. Hüseyin’in bahçesini Hüseyin Ağa b. Hüseyin’e sattığı Mübâya‘a. Mahmiye-i İstanbul’da Defterdâr Ahmedçelebi Mahallesi’nde sâkin Abdurrahman Odabaşı b. Hüseyin meclis-i şer‘-i hatîr-i lâzımü’t-tevkīrde işbu bâ‘isü’l-kitâb Hüseyin Ağa b. Hüseyin mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup Mahmiye-i mezkûrede Koruk Mahmud Mahallesi’nde vâki‘ bir tarafdan Ali Çelebi ve bir tarafdan Mustafa Çelebi ve bir tarafdan Hasan Çelebi mülkleri ve bir tarafdan tarîk-i âm ile mahdûd ve tûlen ve arzen bi-hesâb-ı terbî‘i bin altı yüz zirâ‘ arsa üzerinde mebnî bir bâb tahtânî oda ve bir matbah ve üç su kuyusu ve bir kenîf ve eşcâr-ı müsmire ve gayr-ı müsmireyi müştemil mülk bahçemi bi-cümleti’t-tevâbi‘ ve’l-levâhık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile beş yüz on guruşa mezbûr Hüseyin Ağa’ya bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr beş yüz on guruşu mezbûr Hüseyin Ağa yedinden tamamen ahz u kabz eyledim. Fîmâ-ba‘d zikr olunan bahçe-i mezbûr Hüseyin Ağa’nın mülk-i müşterâsı olup kat‘â benim alâka ve medhalim kalmadı keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 22 Cumâdelûlâ sene [1]143. Şuhûdü’l-hâl: Silahdâr Mustafa Çavuş Ağa b. ( ), Sipâhî Receb Ağa, Silahdar Mehmed Ağa b. Ali, İbrahim Odabaşı b. Abdullah 28 bölük, Sandalcı İbrahim Çelebi b. Abdullah, Ömer Bey b. Mehmed, el-Hâc Mehmed b. Hasan, Mahmud Ağa b. Mehmed.