Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 214 Hüküm no: 189 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocası Mehmed b. Mustafa’nın parasını gasp ettiğini iddia eden Hadice bt. Ahmed’in eşinden boşandığı Havâss-ı Refî‘a kazâsı muzâfâtından Hasköy nâm kasabada müsâferet vechi üzere sâkine olup zâtı ta‘rîf-i şer‘î ile mu‘arrefe olan Hadice bt. Ahmed nâm hatun meclis-i şer‘-i şerîf-i enverde zevci işbu hâfızü’l-kitâb Mehmed b. Mustafa nâm kimesne mahzarında üzerine da‘vâ ve takrîr-i kelâm edip mezbûr Mehmed bi-gayr-ı hakkın esvâbım içinden benim iznim yoğiken yirmi guruş ve üç aded zincirli altınımı ahz u kabz etmeğin suâl olunup meblağ-ı mezbûru bana edâ ve teslîme mezbûr Mehmed’e tenbîh olunması matlûbumdur dedikde gıbbe’s-suâl ve akībe’l-inkâr müdde‘iyye-i mezbûreden müdde‘âsına mübeyyine beyyine taleb olundukda ityân-ı beyyineden izhâr-ı acz ile istihlâf etmeğin fi’l-hakīka mezbûr Mehmed ber-vech-i muharrer müdde‘iyye-i mezbûrenin yirmi guruş ve üç aded zincirli altınını ahz u kabz etmediğine mezbûr Mehmed’e yemîn teklîf olundukda ol dahi hasbe’l-mesûl yemîn bi’llâhi te‘âlâ etmeğin mûcebince müdde‘iyye-i mezbûre bilâ-beyyine bî-vech mu‘ârazadan men‘ mezbûre Hadice meclis-i şer‘de mezbûr Mehmed mahzarında târih-i kitâb günü bâyinen beni tatlîk etmekle zimmetinde mütekarrir ve ma‘kūdun-aleyh bin yüz akçe mehr-i müeccelim ve nafaka-i iddet-i ma‘lûmem ve meûnet-i süknâm için bi’t-terâzî ta‘yîn olunan üç yüz otuz altı akçe cem‘an bin dört yüz otuz altı akçeyi bana edâ ve teslîm ben dahi yedinden ahz u kabz eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 20 Cumâdelûlâ sene [1]143. Şuhûdü’l-hâl: Çukadâr es-Seyyid Ahmed Çelebi b. Ali, Mustafa Beşe b. el-Hâc Ahmed, Mustafa Çelebi b. Mehmed, Bakkāl Yusuf Çelebi b. el-Hâc Süleyman.