Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 215 Hüküm no: 190 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine bt. Yusuf ile kocası Abdullah b. Ahmed’in muhala‘a yoluyla boşandıkları Muhâla‘a. Mahmiye-i İstanbul’da Koca Mustafapaşa kurbünde Çerâği Hasan Mahallesi sâkinelerinden olup zâtı mahalle-i mezbûre imâmı el-Hâc Halil Efendi b. Receb ve Müezzin Molla Mehmed b. İbrahim ta‘rîfleriyle mu‘arrefe olan Emine bt. Yusuf nâm hatun meclis-i şer‘-i şerîf-i enverde bâ‘isü hâze’l-kitâb Abdullah b. Ahmed mahzarında takrîr-i kelâm ve bast-ı merâm edip mezbûr Abdullah zevcim olup beynimizde mu‘âşeretimiz olmamağla ve zimmetinde mütekarrir ve ma‘kūdun-aleyh iki bin yedi yüz akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iyye ile muhâla‘a olduğumda ol dahi hul‘-ı mezbûru kabûl eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 25 Cumâdelûlâ sene [1]143. Şuhûdü’l-hâl: Mehmed Çelebi b. Abdullah, Mehmed Odabaşı b. Ahmed, İsmail Beşe b. Mehmed, Osman Çelebi b. Mehmed, Edirneli Mustafa b. Hasan.