Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 215 Hüküm no: 191 Orijinal metin no: [41a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Komidas v. Mıgırdıç’ın vârislerinin Komidas’ın vasisi olan annesi Maryem bt. Agop üzerine açtıkları davada haksız oldukları Kuyumcu tâifesinden olup mahmiye-i İstanbul’da Langa kurbünde sâkin iken bundan akdem hâlik olan Komidas v. Mıgırdıç v. Kiragos nâm zimmînin verâseti anası Maryem bt. Agop nâm Nasrâniye ile li-üm er karındaşı Asvador ve li-üm kız karındaşı Prabiyon veledey Nikogos’a ve li-ebeveyn ammi oğlu kebîr Agop ve sagīr oğulları İstefanos ve Toma evlâd-ı ( ) münhasıra ve mes’ele-i mîrâsları altı sehmden olup sihâm-ı mezbûreden bir sehmi anası mezbûre Maryem’e ve bir sehmi mezbûrân Agop ve Prabiyon’dan her birine ve bâkī üç sehmin bir sehmi merkūmûn Agop ve İstefanos ve Toma’dan her birine isâbeti tahakkukundan sonra merkūm Asvador asâleten mezbûre Prabiyon v. Nikogos v. Marat tarafından husûs-ı âti’l-beyânda vekîl olduğu zâtını ârifûn Papa Avanis v. Serkiz ve Mardiros v. Kiragos ve Aslan v. Aleksan ve Kirkor v. Agop nâm zimmîler şehâdetleriyle şer‘an sâbit olan Sekyas v. Ağya nâm zimmî meclis-i şer‘-i şerîfde anaları bâ‘isetü’s-sifr mezbûre Maryem muvâcehesinde asâleten ve vekâleten üzerine da‘vâ ve takrîr-i kelâm edip merkūme Maryem mûrisimiz hâlik-i mezbûrun hâl-i sıgārında vasîsi olmağla kendiden mukaddem hâlik olan babası mesfûr Mıgırdıç ve er karındaşı Manoyil ve kız karındaşı Kadsiye nâm Nasrâniyeden ber-mûceb-i defter-i kassâm kendiye isâbet eden üç bin dokuz yüz otuz guruş hisse-i irsiyyesini bi’l-vesâye ahz u kabz edip meblağ-ı mezbûru merkūm Komidas kable’l-ahz hâlik olmağın meblağ-ı mezbûrdan tashîh-i mezkûr üzere bize isâbet eden bin üç yüz on guruşu hâlâ vasiyy-i mezbûre Maryem’den taleb eylediğimizde teslîmden imtinâ‘ eder suâl olunup alıverilmek asâleten ve vekâleten matlûbumuzdur dediklerinde gıbbe’s-suâl mezbûre vasiyy-i mezbûre Maryem cevâbında ber-vech-i muharrer hâlik-i mezbûr Kamidas’ın zikrolunan üç bin dokuz yüz otuz guruş hissesine bi’l-vesâye vaz‘-ı yedini ikrâr lâkin meblağ-ı mezbûrun üç yüz yirmi dört guruşunu hâlik-i mezbûr Komidas’ın hâl-i sıgārında dokuz senede ber-mûceb-i hüccet nafaka-i mefrûzasına sarf edip mâ‘adâ üç bin altı yüz altı guruşunu bülûğundan sonra tasarrufâtı nâfize ve teberru‘âtı câize olduğu hâlde târih-i kitâbdan dört sene mukaddem hâl-i hayât ve kemâl-i sıhhatinde bi’d-defa‘ât kendiye tamamen def‘ ve teslîm ol dahi yedimden ba‘de’l-ahz ve’l-istîfâ husûs-ı mezbûre müte‘allika âmme-i da‘vâdan zimmetimi ibrâ ve iskāt eyledi deyü ba‘de’d-def‘ ve’l-inkâr mezbûre Maryem’den ber-vech-i muharrer def‘-i mezkûrîne mübeyyine beyyine taleb olundukda udûl-i ahrâr-ı ricâl-i Müslimînden mahmiye-i mezbûrede Kâtib Kasım Mahallesi’nde sâkin Mustafa Beşe b. Abdullah ve Şeyh Ferhad Mahallesi’nde sâkin Bezzâzistânî Ahmed Çelebi b. Mehmed nâm kimesneler li-ecli’ş-şehâde meclis-i şer‘-i şerîfe hâzırân olup istişhâd olunduklarında fi’l-hakīka hâlik-i mezbûr Komidas v. Mıgırdıç v. Kiragos bülûğundan sonra tasarrufâtı nâfize ve teberru‘âtı câize olduğu hâlde târih-i kitâbdan dört sene mukaddem hâl-i hayât ve kemâl-i sıhhatinde vasîsi olan anası mezbûre Maryem’in ber-vech-i muharrer bi’l-vesâye makbûzu olan üç bin dokuz yüz otuz guruş hissesini yedinden tamamen ahz u kabz ve istîfâ edip husûs-ı mezkûre müte‘allika âmme-i da‘vâdan anası mezbûre Maryem’in zimmetini ibrâ ve iskāt eylediğini mezbûre Maryem’in menzilinde bizim huzûrumuzda ikrâr u i‘tirâf ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye ettiklerinde gıbbe’t-ta‘dîl ve’t-tezkiye şehâdetleri makbûle olmağın mûcebiyle müdde‘iyân-ı mezbûrân bî-vech mu‘ârazadan men‘ olunup mâ-vaka‘a bi’t-taleb ketb olundu. Fî 26 Cumâdelûlâ sene [1]143. Şuhûdü’l-hâl: Mü’minzâde Mehmed Efendi, el-Hâc Mehmed Efendi b. Abdullah, el-Hâc Mustafa Efendi b. Mehmed, Müezzinzâde el-Hâc Mehmed Efendi b. İbrahim, Bostanzâde es-Seyyid Ahmed Efendi, Tahtacı Mehmed Çelebi, Hüseyin Efendi b. Mehmed Efendi, Kādızâde İbrahim b. Mustafa, Abdullah Çelebi b. Mustafa, Dâmâd İbrahim Çelebi b. Ahmed, Mustafa Çelebi b. Mehmed.