Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 217 Hüküm no: 192 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Külhancı Afa v. Bab ile Panayot v. Yani’nin aralarında alacak davasında anlaştıkları Mahmiye-i İstanbul’da Şahhûbân sarayı sûkunda vâki‘ hamamın külhâncısı Afa v. Bab nâm zimmî meclis-i şer‘-i hatîr-i lâzımü’t-tevkīrde Panayot v. Yani nâm Nasrânî muvâcehesinde ikrâr-ı tâm ve takrîr-i kelâm edip işbu sene-i mübâreke Saferi’nin on beşinci günü mesfûr Panayot’a iki yüz elli guruşa sarı dîbâya kaplı bir samur kürk bey‘ eylediğimde ol dahi ber-vech-i muharrer ba‘de’l-iştirâ ve’l-kabz meblağ-ı mezbûrun yüz otuz guruşunu bana def‘ ve teslîm ben dahi ba‘de’l-kabz meblağ-ı bâkī yüz yirmi guruşu mesfûrdan taleb eylediğimde bana edâdan imtinâ‘ etmekle bundan akdem mesfûr Panayot ile murâfa‘a-i şer‘ olduğumuzda mesfûr Panayot bey‘-i mezkûru bi’l-külliye inkâr etmekle ben dahi müdde‘âmı muvâcehesinde şuhûd-ı udûl ile ba‘de’l-isbât [41b] mesfûr Panayot’a edâsına tenbîh olunan meblağ-ı bâkī-i mezkûr yüz yirmi guruşun yetmiş guruşunu bana def‘ ve teslîm eylediğinde ben dahi ba‘de’l-kabz bâkī kalan elli guruşa müte‘allika da‘vâdan mesfûr Panayot’un zimmetini ibrâ-i âmm-ı kātı‘u’n-nizâ‘la ibrâ ve iskāt eyledim ba‘de’l-yevm mârru’z-zikr samur kürkün semeninden mesfûr Panayot zimmetinde hakkım bâkī kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 26 Cumâdelûlâ sene [1]143. Şuhûdü’l-hâl: Tahtacı Mehmed Çelebi, Sarı Mehmed Çelebi, Salih Çelebi, Hüseyin Efendi, Müezzinzâde Mehmed Efendi.