Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 217 Hüküm no: 193 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. eş-Şeyh Mustafa ve eşi Fâtıma bt. Musa b. Abdullah’ın evlerini Sarraçbaşı Hasan Ağa b. İbrahim’e sattıkları Mübâya‘a. Mahmiye-i İstanbu[l’da] Çerâği Hasan Beşe Mahallesi sâkinlerinden Mustafa Çelebi b. eş-Şeyh Mustafa nâm kimesne asâleten ve zevce-i menkûhası Fâtıma bt. Musa b. Abdullah nâm hatunun sadrî kebîr oğlu ve tarafından husûs-ı âti’z-zikre vekîl olduğu zâtını ârifân el-Hâc İbrahim b. Hüseyin ve Mehmed Çelebi b. Mehmed şehâdetleriyle sâbit ve sübût-ı vekâletine hükm-i şer‘î lâhık olan Mehmed Çelebi b. el-mezbûr Mustafa Çelebi meclis-i şer‘-i şerîf-i enverde bâ‘isü hâze’l-kitâb Sarracbaşı Hasan Ağa b. İbrahim nâm kimesne mahzarında her biri bi’l-asâle ve bi’l-vekâle ikrâr ve takrîr-i kelâm edip akd-i âti’z-zikrin sudûruna değin ale’l-iştirâki’s-seviyy yedimizde mülk ve hakkımız olup mahalle-i mezbûrede vâki‘ bir tarafdan ba‘zan Hâcce Hatun Vakfı ve ba‘zan el-Hâc Evhad Vakfı’ndan Huldîzâde veresesi tasarruflarında olan menzil ve bir tarafdan ba‘zan Ali Ağa ve ba‘zan Havvâ Hatun menzilleri ve bir tarafdan Sâ‘atî el-Hâc İbrahim mülkü ve bir tarafdan tarîk-i âm ile mahdûd ulyâda bir bâb oda ve bir sofa ve vustâda bir oda ve kilâr ve matbah ve süflâda bir oda ve ahır ve kenîf ve bi’r-i mâ ve havlu ve eşcâr-ı müsmire ve gayr-ı müsmireyi müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile dört yüz on guruşa mezbûr Sarracbaşı Hasan Ağa’ya bey‘ ve temlîk ve teslîm eylediğimizde ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr dört yüz on guruşu bi’l-münâsafa yedinden tamamen ahz u kabz eyledik fîmâ-ba‘d menzil-i mahdûd-ı mezkûr merkūm Sarracbaşı Hasan Ağa’nın mülk-i müşterâsı olup kat‘â bizim alâka ve medhalimiz kalmadı Keyfemâ-yeşâ ve yahtâr mutasarrıf olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 Cumâdelûlâ sene [1]143. Şuhûdü’l-hâl: el-Hâc Halil Efendi el-imâm, Mustafa Çelebi b. Mehmed, Mehmed Halîfe b. İbrahim el-müezzin, Berber Mustafa Çelebi b. Abdullah, Yusuf Ağa b. Abdullah, el-Hâc Ahmed Ağa b. Mehmed, Hüseyin Odabaşı b. Mehmed, Mehmed Çelebi b. Mehmed, el-Hâc İbrahim b. Hüseyin, el-Hâc Mustafa b. Hasan, Süleyman Çelebi b. Haydar, İbrahim Çelebi b. el-Hâc Mehmed, Mehmed Çelebi b. Abdullah.