Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 218 Hüküm no: 194 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Çelebi b. Hasan’ın tasarrufunda olan evin kullanım hakkını Mehmed Çelebi b. Ahmed’e sattığı Mübâya‘a ve tevcîh. Ashâb-ı hayrâtdan merhûm Za‘îm Mehmed Ağa nâm sâhibü’l-hayrın mahmiye-i İstanbul’da Cerrâhpaşa kurbünde Kürkçübaşı Mahallesi’nde vâki‘ İhlâshân odaları demekle ma‘rûf odalardan süknâya muhtâc sulehâya meşrûta vakfı olup bir tarafdan Bâkīzâde İbrahim Ağa bahçesi ve bir tarafdan Hüseyin Çavuşzâde Mustafa Ağa bahçesi ve bir tarafdan vakf-ı mezbûrdan Tarakçı Çelebi tasarrufunda olan menzil ve bir tarafdan yine vakf-ı mezbûrdan ba‘zan Ahmed Beşe menzili ve ba‘zan tarîk-i hâs ile mahdûd fevkānî bir bâb oda ve bir sofa ve tahtânî bir bâb oda ve bir sofa ve bodrum ve kenîf ve havluyu müştemil menzile ber-mûceb-i şart-ı vâkıf tevcîh-i hâkimü’ş-şer‘le mutasarrıf olan İsmail Çelebi b. Hasan nâm kimesne meclis-i şer‘-i şerîf-i enverde işbu bâ‘isü’l-kitâb Mehmed Çelebi b. Ahmed nâm kimesne mahzarında ikrâr ve takrîr-i kelâm edip işbu hüccet-i şer‘iyye mantûkunca ebniye-i mezkûresi yedimde mülk ve hakkım olmağla ebniye-i mezkûreyi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mehmed Çelebi’ye yüz on guruşa bey‘ ve temlîk ve teslîm ve arsasından kasr-ı yed eylediğimde ol dahi ber-vech-i muharrer iştirâ ve tesellüm ve kabûl eyledikden sonra semeni olan meblağ-ı mezbûr yüz on guruşu mezbûr Mehmed Çelebi yedinden tamamen ahz u kabz eyledim dedikde gıbbe’t-tasdîkı’ş-şer‘î mezbûr Mehmed Çelebi sulehâdan ve süknâya muhtâc idiği zeyl-i kitâbda muharrerü’l-esâmî Müslimîn haberleriyle müte‘ayyin olmağın arsa-yı mezkûre cânib-i şer‘den ber-mûceb-i şart-ı vâkıf mezbûr Mehmed Çelebi’ye tevcîh ve tasarrufi’çün işbu vesîka ketb ve yedine i‘tâ olundu. Fi’l-yevmi’s-sâmin ve’l-ışrîn min-Cemâziyelevvel sene [1]143. Şuhûdü’l-hâl: İmâm Ahmed Efendi b. Mustafa, Mustafa Çelebi b. Yusuf, Halil Çelebi b. İbrahim, İshak Beşe b. Ali, İbrahim b. Ali, diğer İbrahim b. el-Hâc Mehmed, Abdi Çelebi b. Ali, Mustafa b. Hüseyin, Süleyman b. Ömer, Abdürrahim Çelebi b. Ahmed.