Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 228 Hüküm no: 206 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmudpaşa civarındaki Çizmecibaşı Davud Ağa’nın vakfettiği mektebin keşfi ve tamiri için mütevellîsine izin verildiği Keşf-i mekteb, bâ-imzâ-i hazret-i efendi. Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i enverden keşif nâibi Mevlânâ Yusuf Efendi irsâl olunup ol dahi hâssa mi‘mârlarından Üstâd Hüseyin Halîfe b. Ömer ve Süleyman Halîfe b. Abdi ile mahmiye-i İstanbul’da Mahmud Paşa Câmi‘-i şerîfi kurbünde Çizmecibaşı Davud Ağa nâm sâhibü’l-hayrın vakfeylediği mektebe varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i nebevî edip vakf-ı mezbûr mütevellîsi el-Hâc Ahmed Çelebi b. İsmail nâm kimesne meclis-i ma‘kūd-ı mezbûrda takrîr-i kelâm edip işbu mu‘âyene ve müşâhede olunan mekteb tarîk-i âm üzerinde olup mürûr-ı eyyâm ile harâba müşrif ve bi’l-külliye tarîk-i âm tarafına meyletmekle ta‘mîr ve termîme eşedd-i ihtiyâc ile muhtâc olduğuna binâen mekteb-i mezbûr keşif ve tahmîn-i sahîh ile tahmîn olunup masrûfum vakf-ı mezbûrun hâsıl olan nemâsından olmak üzere kendi mâlımla ta‘mîre kıbel-i şer‘-i enverden izin verilmek bi’t-tevliye matlûbumdur dedikde ba‘de’l-mu‘âyene ve’l-müşâhede hâl mütevellî-i mezbûrun takrîr-i meşrûhuna mutâbık olduğu lede’ş-şer‘i’l-enver zâhir ve mukarrer olmağla mi‘mârân-ı mezbûrân mesâha ve tahmîn ve takvîm eylediklerinde sakfıyla tahta döşemeli ve tavanlı ve etrâfı dolma duvarlı ve aşı boyalı nîm şişeli tahta perdeli tûlen on bir buçuk ve arzen dokuz zirâ‘ olup bi-hesâb-ı terbî‘i yüz beş zirâ‘ ebniyenin beher zirâ‘ı üçer yüz akçeden otuz bir bin sekiz yüz akçe ile ancak vücûda gelir bundan noksan ile olmaz deyü mi‘mârân-ı mezbûrân ile Müslimûn-ı merkūmûn haber vermeleriyle mûcebince ber-vech-i meşrûh binâya ba‘de’l-izn mevlânâ-yı mezbûr mahallinde ketb ü tahrîr ve ba‘dehû ma‘an ba‘s olunan Çukadâr Halil ve Mustafa ile meclis-i şer‘a gelip alâ-vukū‘ihî inhâ eylediklerinde mâ-hüve’l-vâki‘ bi’t-taleb ketb olundu. Fî 3 min-Cumâdelâhire sene [1]143. Şuhûdü’l-hâl: El-hâc Mehmed b. el-Hâc Ahmed, İbrahim Çelebi b. Mehmed, el-Hâc Mahmud b. Abdülmümin, İbrahim Çelebi b. Abdullah, Berber Hüseyin Çelebi b. Abdullah, Molla Emrullah b. Ramazan, Mehmed Bey b. Hüseyin, Kalaycı Hasan, Yazıcı Hacı İsmail.