Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 229 Hüküm no: 207 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fersani bt. Asnaki’nin ölen kardeşi Eşmaki’nin terekesine vasi tayin olunan Penaki v. Yorgi üzerine açtığı davadan men olunduğu Mahmiye-i İstanbul’da Samatya kurbünde Mirâhor Mahallesi sâkinelerinden Fersani bt. Asnaki nân Nasrâniye meclis-i şer‘-i hatîr-i lâzımü’t-tevkīrde Penaki v. Yorgi nâm Nasrânî muvâcehesinde üzerine takrîr-i da‘vâ ve tasvîr-i müdde‘â edip bundan akdem Mısr-ı Kahire’de hâlik olan li-ebeveyn karındaşım Eşmaki nâm zimmî kable’l-helâke terekesini kabz ve ben hasren vârisi olmağla bana îsâle işbu mezbûr Penaki’yi vasî nasb ve ta‘yîn eylediğinden [eylediğimden] sonra mesfûr Penaki hâlik-i mezbûrun terekesinden bi’l-vesâye on altı kîselik zincirli altın ve altı kîselik mütenna‘? kürk ve on iki aded temessük kabz ve bana ancak iki yüz on iki aded zincirli altın teslîm bâkīsini taleb eylediğimde bana edâ ve teslîmden imtinâ‘ eder suâl olunup takrîri tahrîr ve tereke-i bâkiyyenin bana teslîme tenbîh olunmak bi’l-verâse matlûbumdur dedikde gıbbe’s-suâl mesfûr Penaki cevâbında hâlik-i mezbûrun vasîsi olduğunu ikrâr lâkin hâlik-i mesfûrun terekesi ancak iki yüz on iki altına bâliğ olmağla ol mikdâr makbûzumu tamamen kendiye teslîm eylediğimde tereke-i müteveffâ-i mezbûra müte‘allika âmme-i da‘vâdan zimmetimi ibrâ etmişidi deyü da‘vâyı def‘le mukābele edicek gıbbe’l-istintak ve akībe’l-inkâr mesfûr Penaki’den def‘-i mezkûrunu mübeyyine beyyine taleb olundukda udûl-i ahrâr-ı ricâlden <> Papa Kiriloz v. Penaki ve Papa Makaryos v. Dimitri nâm râhibler meclis-i şer‘a hâzırân olup isre’l-istişhâd fi’l-hakīka işbu mezbûr Penaki müdde‘iyye-i mezbûre Fersani’nin li-ebeveyn karındaşı ve Mısr-ı Kahire’de hâlik olan Eşmaki v. Asnaki v. Todori’nin terekesinden makbûzu olan iki yüz on iki aded zincirli altını müdde‘iyye-i mesfûreye bizim huzûrumuzda teslîm eylediğinde müdde‘iyye-i mezbûre Fersani hâlik-i mezbûrun terekesine müte‘allika âmme-i da‘vâdan mezbûr Penaki’nin zimmetini ibrâ-i âmm-ı kātı‘u’n-nizâ‘la ibrâ ve iskāt eyledi bizler bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe ri‘âyet-i şerâiti’l-kabûl şehâdetleri makbûle olmağın mûcebince müdde‘iyye-i mezbûre bî-vech mu‘ârazadan men‘ olunup mâ-vaka‘a bi’t-taleb ketb olundu. Fî 2 Cemâziyelâhir sene [1]143. Şuhûdü’l-hâl: Mefharü’l-kuzât es-Seyyid Ahmed Efendi, Sarı Mehmed Çelebi, Okumuşzâde Ahmed Çelebi, Muhzır Hüseyin Çelebi.