Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 230 Hüküm no: 208 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm bt. Mustafa ile kocası Yahya Çelebi b. Mehmed’in muhala‘a yoluyla boşandıkları Muhâla‘a. Mahmiye-i İstanbul’da Salihpaşa Mahallesi sâkinelerinden olup zâtı Ali Çelebi b. Mustafa ve el-Hâc Şu‘ayb b. Mehmed nâm kimesneler ta‘rîfleriyle mu‘arrefe olan Ümmügülsüm bt. Mustafa nâm hatun meclis-i şer‘-i hatîr-i lâzımü’t-tevkīrde zevc-i dâhili olan bâ‘isü’l-kitâb Yahya Çelebi b. Mehmed nâm kimesne mahzarında ikrâr-ı tâm ve takrîr-i kelâm edip mezbûr Yahya Çelebi zevcim olup beynimizde hüsn-i mu‘âşeretimiz olmamağla zimmetinde mütekarrir ve ma‘kūdun-aleyh üç bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Yahya Çelebi ile muhâla‘a-i sahîha-i şer‘iyye ile hul‘ eylediğimde ol dahi hul‘-ı mezbûru ba‘de’l-kabûl hukūk-ı zevciyyete müte‘allika âmme-i de‘âvî ve kâffe-i mütâlebât ve muhâsamâtdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 3 Cemâziyelâhir sene [1]143. Şuhûdü’l-hâl: Ali Çelebi b. Mustafa, el-Hâc Şu‘ayb b. Mehmed, İbrahim Çelebi b. Mustafa, Mehmed Çelebi b. Abdullah, diğer Mehmed Çelebi b. Abdullah, Du‘âcı İbrahim b. Mustafa, Ahmed b. Hasan.