Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 231 Hüküm no: 209 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kocasından boşanan Ümmügülsüm Hatun bt. Mustafa’nın küçük oğlu Mustafa için nafaka bağlandığı Nakafa. Mahmiye-i İstanbul’da Salihpaşa Mahallesi sâkinelerinden olup zâtı Ali Çelebi b. Mustafa ve İbrahim Çelebi b. Mustafa nâm kimesneler ta‘rîfleriyle mu‘arrefe olan bâ‘isetü hâzihi’l-vesîka Ümmügülsüm Hatun bt. Mustafa meclis-i şer‘-i hatîr-i lâzımü’t-tevkīrde zevc-i muhâla‘ı Yahya Çelebi b. Mehmed nâm kimesne muvâcehesinde takrîr-i kelâm bast-ı merâm edip mezbûr Yahya Çelebi’nin firâşından hâsıl ve benden mütevellid ve bi-hakkı’l-hıdâne hacr ve terbiyemde olan işbu sadrî sagīr oğlum Mustafa’nın mâlı olmayıp nafakaya ihtiyâcı olmağla oğlum sagīr-i mezbûrun nafakasi’çün kıbel-i şer‘den babası mezbûr Yahya Çelebi üzerine kadr-i ma‘rûf akçe farz ve takdîr olunmak murâdımdır dedikde gıbbe’t-tasdîkı’ş-şer‘î hâkim-i muvakki‘-ı sadr-ı kitâb -tûbâ-lehû ve hüsnü meâb- efendi hazretleri dahi sagīr-i mezbûr Mustafa’nın nafakasi’çün babası mezbûr Yahya üzerine bi’t-terâzî târih-i kitâbdan beher yevm dörder akçe farz ve takdîr edip meblağ-ı mefrûz-ı mezkûru sagīr-i mezbûrun nafakasına harc ve sarfa ve lede’l-iktizâ istidâneye ve inde’z-zafer babası mezbûr Yahya üzerine rücû‘a vâlidesi mezbûre Ümmügülsüm Hatun’a izin vermeğin mâ-vaka‘a bi’t-taleb ketb olundu. Fî 3 Cemâziyelâhir sene [1]143. Şuhûdü’l-hâl: Mehmed Çelebi b. Abdullah, diğer Mehmed Çelebi b. Abdullah, Salih Çelebi b. Süleyman, Ali Çelebi b. Mustafa, el-Hâc Şu‘ayb b. Mehmed, İbrahim b. Mustafa, Ahmed b. el-Hâc Hasan, Du‘âcı İbrahim b. Mustafa.