Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 231 Hüküm no: 210 Orijinal metin no: [45a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tamire muhtaç olan vakıf evin tamir edilebilmesi için tasarruf hakkının satışına izin verildiği Bey‘e izin. Mahmiye-i İstanbul’da Aksaray kurbünde Gurebâ Hüseyinağa Mahallesi’nde sâkin iken bundan akdem vefât eden el-Hâc Ahmed b. Hüseyin b. Abdullah’ın sulbî oğlu Muslu nâm sagīrin min-kıbeli’l-üm ceddi ve tesviye-i umûruna kıbel-i şer‘den mansûb vasîsi olan Osman Odabaşı b. Muslu nâm kimesne meclis-i şer‘-i hatîr-i lâzımü’t-tevkīrde takrîr-i kelâm ve tâ‘bir ani’l-merâm edip gallesi Hacı Ahmed nâm sâhibü’l-hayrın mahalle-i mezbûr imâmlarına meşrûta vakfı olup mahalle-i mezbûrede vâki‘ bir tarafdan eş-Şeyh Mehmed Efendi b. Sunullah menzili ve bir tarafdan Fâtıma nâm hatun menzili ve bir tarafdan Haseki Halil Ağa menzili ve bir tarafdan tarîk-i âm ile mahdûd ma‘lûmü’l-müştemilât vakıf menzilin bi’l-icâreteyn nısf-ı şâyi‘i benim ve nısf-ı şâyi‘-i âharı müteveffâ-i mezbûrun tasarrufunda olmağla ba‘de’l-vefâtihi nısf-ı şâyi‘-i mezbûr sagīr-i mezbûr ile zevce-i menkûha-i metrûkesi Havvâ bt. Osman nâm hatunun batnında zâhir hamle intikāl edip lâkin menzil-i mezbûr harâb ve ta‘mîr ve termîme sagīr-i mezbûrun kudreti olmayıp ve kābil-i intifâ‘ olmadığından gayrı sagīr-i mezbûrun nafaka ve <> kisvesine kâfi mâlı olmamağın menzil-i mezbûrun nısf-ı şâyi‘-i mezbûru bedel-i misli ve ma‘rifet-i mütevellî ile âhara ferağ ve bedel-i mezbûr i‘mâl ve sagīr-i mezbûr infâk olunmak sagīr-i mezbûr ile haml-i merkūme min-külli’l-vücûh enfa‘ ve evlâ olmağla hakīkat-ı hâl vukūf-ı tammı olan bî-garaz Müslimînden istihbâr olunup ber-vech-i muharrer kıbel-i şer‘den izin verilmek bi’l-vesâye murâdımdır dedikde hakīkat-ı hâl zeyl-i kitâbda isimleri mastûr Müslimînden istihbâr olundukda fi’l-vâki‘ husûs-ı mezkûr bi’l-cümle vasiyy-i mezbûrun takrîr-i meşrûhu üzere idiğini ihbâr etmeleriyle vasiyy-i mezbûr Osman Odabaşı’ya kıbel-i şer‘den izin-birle mâ-hüve’l-vâki‘ bi’t-taleb ketb olundu. Fî 6 Cemâziyelâhir sene [1]143. Şuhûdü’l-hâl: Eş-şeyh Mehmed Efendi b. Sunullah, imâm vekîli Abdullah Efendi b. Mehmed, İbrahim Çelebi b. Mehmed, Salih Çelebi b. Abdullah, Ebûbekir b. Yusuf, el-Hâc Ali b. Osman, Ali Çelebi b. Mahmud, el-Hâc Mustafa b. Abdullah, Salih Çelebi b. Ali, Mehmed Çelebi b. Abdullah, Ahmed Çelebi b. Hasan, İbrahim b. Mustafa, Abdullah Çelebi b. Mustafa, Mehmed b. Mehmed.