Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 233 Hüküm no: 212 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. İsmail ile eşi Mehmed b. Kasım’ın muhala‘a yoluyla boşandıkları Muhâla‘a. Mahmiye-i İstanbul’da Silivrikapısı kurbünde vâki‘ İbrahimpaşa Mahallesi’nde sâkine olup zâtı İbrahim b. Mustafa ve İsmail b. Mehmed nâm kimesneler ta‘rîfleriyle mu‘arrefe olan Fâtıma bt. İsmail nâm hatun meclis-i şer‘-i şerîf-i enverde zevc-i dâhili işbu hâfızü’l-kitâb Mehmed b. Kasım nâm kimesne mahzarında ikrâr ve takrîr-i kelâm edip mezbûr Mehmed zevcim olup beynimizde hüsn-i zindegānemiz olmamağla zimmetinde mütekarrir ve ma‘kūdun-aleyh olan on bir guruş mehr-i müeccel hakkımın yedi guruşunu bana def‘ ve teslîm bâkī dört guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mehmed ile muhâla‘a-i sahîha-i şer‘iyye ile muhâla‘a eylediğimde ol dahi ber-vech-i muharrer hul‘-ı mezbûru kabûl edip hukūk-ı zevciyyete müte‘allika âmme-i de‘âvî ve kâffe-i mütâlebâtdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 3 Cumâdelâhire sene [1]143. Şuhûdü’l-hâl: Hamid Çelebi b. Abdullah, Hüseyin Çelebi b. Mehmed, İbrahim Çelebi b. Mustafa, Ahmed b. Şa‘ban, Ya‘kub b. Abdullah, Abdullah b. Mustafa.