Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 234 Hüküm no: 213 Orijinal metin no: [45b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ahmed ile eşi Hasan b. Mehmed’in muhala‘a yoluyla boşandıkları Muhâla‘a. Mahmiye-i İstanbul’da Sultan Selim kurbünde vâki‘ Çukurbostan’da sâkine olup zâtı es-Seyyid Mehmed b. Bayram ve Hasan Çelebi b. Mustafa nâm kimesneler ta‘rîfleriyle mu‘arrefe olan Âişe bt. Ahmed nâm hatun meclis-i şer‘-i şerîf-i enverde zevc-i dâhili işbu bâ‘isü’l-kitâb Hasan b. Mehmed nâm kimesne mahzarında ikrâr-ı tâm ve takrîr-i kelâm edip mezbûr Hasan zevcim olup beynimizde hüsn-i zindegānemiz olmamağla zimmetinde mütekarrir ve ma‘kûdun-aleyh olan iki bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Hasan ile muhâla‘a-i sahîha-i şer‘iyye ile muhâla‘a eylediğimde ol dahi ber-vech-i muharrer hul‘-ı mezbûru kabûl edip hukūk-ı zevciyyete müte‘allika âmme-i de‘âvî ve kâffe-i mütâlebâtdan her birimiz âharın zimmetini ibrâ-i âm ile ibrâ ve iskāt eyledik dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 Cumâdelâhire sene [1]143. Şuhûdü’l-hâl: Kādızâde İbrahim b. Mustafa, Seyyid Mehmed b. Bayram, Hasan Beşe b. Ahmed, Solak Mehmed.