Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 234 Hüküm no: 214 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karakaş Mehmed Ağa’nın Sinop iskelesinden gemiyle gönderdiği çirişin satışından dolayı Ahmed Efendi ile olan davasında sulh olduğu Vilâyet-i Anadolu’da vâki‘ medîne-i Tokat ahâlîsinden olup mahmiye-i İstanbul’da Esîrci Kemal Mahallesi’nde sâkin tüccâr tâifesinden Karakaş Mehmed Ağa b. el-Hâc Ebûbekir nâm kimesne meclis-i şer‘-i şerîf-i enverde bâ‘isü’l-kitâb umdetü erbâbi’t-tahrîr ve’l-kalem Ahmed Efendi b. el-Hâc Salih b. Mehmed Efendi tarafından husûs-ı âti’z-zikre vekîl olduğu Mustafa Ağa b. İsmail ve Ali Beşe b. Mustafa şehâdetleriyle sâbit ve sübût-ı vekâletine hükm-i şer‘î lâhık olan Mehmed Ağa b. Mehmed mahzarında ikrâr ve takrîr-i kelâm edip medîne-i mezkûrede sâkin karındaşım el-Hâc Resul yedinde emânet olan mâlımdan mecmû‘u üç bin altı yüz otuz sekiz guruş kıymetli yüz dört deste ( ) ve bir kantar çirişimi emr ve ma‘rifetimle tarafıma îsâl ve teslîmi için yine Tokâdî el-Hâc İsmail b. el-Hâc Osman’a def‘ ve teslîm ol dahi vech-i muharrer yedinden ba‘de’l-kabz Sinop iskelesinden sefîneye tahmîl ve esnâ-i tarîkde mezbûr el-Hâc İsmail bi-emri’llâhi te‘âlâ vefât edip eşyâ-i mezkûrem sefîne-i merkūme ile bin yüz yirmi yedi senesi Şa‘bânında medîne-i Galata iskelesine geldikde müvekkil-i mûmâ-ileyh Ahmed târih-i mezkûrda medîne-i mezbûre voyvodası olan Dergâh-ı âlî kapıcıbaşılarından el-Hâc Osman Ağa tarafından medîne-i mezkûrede bilâ-vâris vefât edenlerin terekesini kabza memûr olmağla eşyâ-i mezkûremi müteveffâ-i mezbûrun terekesinden olmak üzere ahz u kabz ve âhara bey‘ ile istihlâk etmeğin semen-i mezbûru müvekkil-i mûmâ-ileyhden da‘vâya tasaddî eylediğimde ol dahi cevâbında eşyâ-i mezkûreyi müteveffâ-i mezbûrun terekesinden olmak üzere bi’l-emâne kabz ve iki yüz altmış üç bin sekiz yüz iki akçeye âhara ba‘de’l-bey‘ meblağ-ı mezkûr bi’l-emâne yedimde iken müteveffâ-i mezbûrun veresesinden babası mezbûr el-Hâc Osman asâleten ve anası Âişe Hatun bt. el-Hâc Hamza tarafından vekâleten meclis-i şer‘de meblağ-ı mezbûru benden da‘vâ ve müdde‘âsın şuhûd-ı udûlle ba‘de’l-isbât ve’l-hükm meblağ-ı mezkûru yedimden bi’l-verâse asâleten ve vekâleten ahz u kabz etmişidi deyü takrîrine muvâfık bir kıt‘a hüccet ibrâz etmekle beynimizde ba‘de vukū‘ı’l-münâza‘a muslihûn tavassut edip da‘vâ-yı mezkûremden beni müvekkil-i mûmâ-ileyh ile üç yüz guruş üzerine sulh eylediklerinde ben dahi sulh-ı mezkûru kabûl ve bedel-i sulh-ı mezkûrun yüz kırk guruşunu nakd ve semeni doksan guruşa mu‘âdil bir sim hançer ve altmış altmış guruş kıymetli üç top uzun şâhî ve on guruş kıymetli dört zirâ‘ mâî (mavi) çuka müvekkil-i mûmâ-ileyh Ahmed Efendi yedinden ahz u kabz eylediğimden sonra husûs-ı mezkûre müte‘allika âmme-i de‘âvî ve mütâlebât ve muhâsamâtdan her birimiz âharı ibrâ-i âmm-ı kātı‘u’n-nizâ‘la ibrâ ve iskāt eyledik min-ba‘d husûs-ı mezkûra müte‘allika birbirimiz ile vechen mine’l-vücûh da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti Cumâdelâhire sene [1]143. Şuhûdü’l-hâl: Hancızâde Mehmed Ağa, Hâfız Ya‘kub Efendi b. Salih, Yusuf Çelebi b. Ca‘fer, Mehmed Çelebi b. ( ), Çukadâr Ömer Bey, Molla Mehmed b. Hüseyin, el-Hâc Abdullah b. Mehmed, Üsküdarî Hoca Efendi, Osman Çelebi b. Ramazan, Mehmed Çelebi b. Abdullah.