Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 235 Hüküm no: 215 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayseri’ye tâbi Isbıdın köyündeki Marat v. Bedros’a teslim ve borcunu ödemesi için Acer v. Kovan’a tenbihte bulunulduğu Vilâyet-i Anadolu’da vâki‘ medîne-i Kayseriye kazâsına tâbi‘-i Isbıdın nâm karye ahâlîsinden olup mahsûse-i Galata kazâsına tâbi‘ Ortaköy nâm karyede müsâfiren sâkin bâ‘isü hâze’s-sifr Marat v. Bedros nâm zimmî meclis-i şer‘-i hatîr-i lâzımü’t-tevkīrde yine karye-i mezbûre ahâlîsinden olup mahmiye-i İstanbul’da müsâfiren mütemekkin Acer v. Kovan nâm zimmî muvâcehesinde üzerine da‘vâ ve takrîr-i kelâm edip karye-i mezbûre sınırı dâhilinde vâki‘ etrâf-ı erba‘adan el-Hâc Süleyman ve Agop ve mesfûr Acer bağları ve tarîk-i âm ile mahdûd Yukarı bağ tâ‘bir olunur ma‘lûmü’l-mikdâr kürûmu mülk bağım ile yine karye-i mezbûre sınırı dâhilinde vâki‘ etrâf-ı erba‘adan Panos nâm zimmî bağı ve mâ-i cârî ve cebel ve Ebil virânesi ile mahdûd kezâlik kürûmu mülk ma‘lûmü’l-mikdâr bağımın kürûm-ı memlûkelerini bin yüz otuz sekiz senesi Zilhicceti’ş-şerîfesi evâhirinde mezbûr Acer zimmî yüz altmış guruş semen-i medfû‘ ve makbûza vefâen bey‘ ve mahallinde zabt ve tasarrufa taslît eylediğimde ol dahi ber-vech-i muharrer iştirâ ve kabûl ve mahallinde zabt eyledikden sonra mârru’z-zikr bağları mesfûr Acer zimmîden bin yüz kırk iki sene[si] şehr-i Rebî‘ülevveli gurresinde Mahmiye-i İstanbul’da Mahmud Paşa Mahkemesi’nde nâibü’ş-şer‘ olan Nedim Ahmed Efendi b. Mehmed huzûrunda ba‘de’d-da‘vâ ve’l-münâza‘a vesâtet-i muslihûn ile da‘vâ-yı mezbûremden fâriğ olup Yukarı bağ tâ‘bir olunan ancak bir kıt‘a bağ-ı mezbûre ve menâfi‘ine müte‘allika da‘vâdan mesfûr Acer’i ibrâ ve iskāt eylediğimde mesfûr [46b] Acer dahi ber-vech-i meşrûh makbûzum olan meblağ-ı mezbûr yüz altmış guruşu târih-i mezbûrdan altı ay tamamına değin kendiye edâ ve teslîm etmek üzere bi’t-taleb beni te’cîl ve zikr olunan bir kıt‘a Aşağı bağ tâ‘bir olunan bağı bana teslîme ta‘ahhüd etmekle ben dahi ber-vech-i meşrûh kabûl ve ecl-i merkūm hulûlünde bağ-ı mezbûru edâya ta‘ahhüd etmişidim hâlâ ecl-i mezkûr hulûl etmekle meblağ-ı mezbûru kendiye edâ ve teslîm ve bağ-ı mezbûru geri taleb eylediğimde mesfûr Acer zimmî meblağ-ı mezbûru ahz ve bağ-ı merkūmu bana teslîmden imtinâ‘ eder suâl olunup meblağ-ı mezbûru ahza ve zikrolunan tahdîd ve tavsîf olunan bir kıt‘a Aşağıbağ’dan kasr-ı yed ve mahallinde bana teslîme tenbîh olunmak murâdımdır dedikde gıbbe’s-suâl mesfûr Acer zimmî cevâbında fi’l-hakīka kaziyye bi’l-cümle müdde‘î-i mesfûrun takrîr-i meşrûhu üzere olduğunu ikrâr u i‘tirâf etmeğin mûcebince meblağ-ı mezbûr yüz altmış guruşu ba‘de’l-ahz mârru’z-zikr Aşağı bağ tâ‘bir olunan bir kıt‘a bağ-ı mezbûrdan kasr-ı yed etmek üzere mesfûr Acer zimmîye tenbîh-birle mâ-hüve’l-vâki‘ bi’t-taleb ketb olundu. Fî 6 Cumâdelâhire sene [1]143. Şuhûdü’l-hâl: Ali b. el-Hâc Veli, diğer Ali b. İsmail, Ömer b. Seyfi, Mehmed b. Abdullah, İsmail b. Mehmed.