Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 288 Hüküm no: 464 Orijinal metin no: [44a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kınalıada ve tevabi‘inin mukâtaaya verilmesi Mahrûse-i Üsküdar’da cezîre-i Surh ve tevâbi‘i mukāta‘asına ber vech-i iltizâm emîn olan Yuhan v. Menahim nâm Yahudi mahfil-i kazâda Pandazi v. Dimitri ve Andriye v. Yorgi nâm zimmîler mahzarlarında ikrâr edip zikr olunan mukāta‘ayı bundan akdem altmış bin akçe peşîn ve otuz bin akçe de tahvîl tamâmına vermek şartıyla cem‘an doksan bin akçeye iltizâm eylemişdim hâlâ mukāta‘a-i mezbûrenin içinde Kızılada karyeciği elli bin akçe hesâbı üzre yine bende olan şurût ve kuyûduyla mezbûrânı kendime şerîk edip on beş bin akçelerin ber vech-i peşîn aldım ve on beş binden bini peşîn vericek oldum ve bâkī yirmi bin akçesini dahi tahvil tamâmına vericek olduk ve ikimiz bir yerde olmayınca birimiz mahsûl kabz etmeyeyüz dedikde mezbûrun vech-i meşrûh üzre vâki‘ olan ikrârını mukarrun lehüma’l-merkūmân vicâhen ve şifâhen tasdîk eyledikde mâ vaka‘a ketb olundu. Şuhûdü’l-hâl: Mustafa b. Pîrî, Murad b. Abdullah, Sefer b. Abdullah, Muttalib b. Süleyman, Mehmed b. Behrâm, Hasan b. Sâdık ve gayruhüm