Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 293 Hüküm no: 475 Orijinal metin no: [45a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman Bey’in çayırın tasarruf hakkını Kurd Ağ b. Abdülmennân’a bıraktığı Kıdvetü’l-ekārim ve’l-efâhim umdetü’l-e‘âzım ve’l-mekârim el-mahfûf bi sunûfi avâtıfi’l-meliki’l-a‘lâ Kurd Ağa b. Abdülmennân tarafından husûs-ı âtîye Mehmed b. Hüseyin er-râcil ve Ahmed b. Bâli şehâdetleriyle vekâleti sâbite olan fahrü’l-akrân Hızır Bey b. Mahmud mahfil-i kazâda Dergâh-ı âlî bevvâblarından olup Hoca Paşa mahallesinde sâkin olan fahrü’l-emâsil ve’l-akrân Osman Bey b. Abdülmennân el-bevvâb-ı sultânî tarafından yine şâhidân-ı mezbûrân şehâdetleriyle husûs-ı âtîye vekâleti sâbite olan Sefer Bey b. Süleyman nâm râcil mahzarında ikrâr ve takrîr-i merâm kılıp Bulgurlu nâm karyede etrâf-ı erba‘ası tarîk-i âmla mahdûd olan müvekkilimin tahmînen iki dönüm mikdârı çayırını merhûm Osman Bey on iki bin nakid akçeye masraf takdîri ile hakk-ı tasarrufunu tefvîz edip mukābele-i tefvîzde meblağ-ı mezbûru bi’t-tamâm alıp kabz edip zikr olunan çayırı mûmâileyhe teslîm eyledim dedikde mukırr-ı mezbûrun vech-i meşrûh üzre olan ikrârını mukarrun lehü’l-merkūm vicâhen tasdîk eylediği kayd şud. Şuhûdü’l-hâl: Müstedâm Bey, Osman Bey, Hacı Memi b. Abdullah, Hüseyin b. Behrâm, Hasan b. Sâdık, Mehmed b. Behrâm