Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 237 Hüküm no: 218 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tamire muhtaç olan vakıf evdeki Rukiye ve Mehmed’e ait hissenin vasileri olan anneleri tarafından satışına izin verildiği Bey‘e izin. Mahmiye-i İstanbul’da Unkapanı kurbünde Arabacılar Mahallesi ahâlîsinden iken bundan akdem vefât eden el-Hâc Mehmed b. Abdullah b. Abdurrahman’ın zevce-i menkûha-i metrûkesi ve evlâd-ı sıgārı Rukiye ve Mehmed’in vâlideleri ve tesviye-i umûrlarına kıbel-i şer‘den mansûb vasîleri olan Hanife bt. Abdullah nâm hatun ba‘de’t-ta‘rîfi’ş-şer‘î meclis-i şer‘-i hatîr-i lâzımü’t-tevkīrde takrîr-i kelâm ve tâ‘bir ani’l-merâm edip ashâb-ı hayrâtdan Hacı Mehmed nâm sâhibü’l-hayrın vakfından olup mahalle-i mezbûrede vâki‘ bir tarafdan yine vakf-ı mezbûrdan olup Çukadâr Halil b. İbrahim nâm kimesne tasarrufunda olan menzil ve bir tarafdan yine vakf-ı mezbûrdan Kazgancı Ahmed b. İbrahim nâm kimesne tasarrufunda olan menzil ve bir tarafdan tarîk-i hâs ve bir tarafdan tarîk-i âm ile mahdûd ma‘lûmü’l-müştemilât vakıf menzilin bi’l-icâreteyn nısf-ı şâyi‘i benim ve nısf-ı şâyi‘-i âharı zevcim müteveffâ-i mezbûr el-Hâc Mehmed’in tasarrufunda olmağla ba‘de’l-vefâtihi nısf-ı şâyi‘-i mezbûr sagīrân-ı mezbûrân Rukiye ve Mehmed’e intikāl edip lâkin menzil-i mezbûr harâb ve ta‘mîr ve termîme sagīrân-ı mezbûrânın kudretleri olmamağla bir vechile kābil-i intifâ‘ olmadığından gayrı sagīrân-ı mezbûrânın nafaka ve kisveye dahi ihtiyâcları [47a] olmağın menzil-i mezbûrdan nısf-ı şâyi‘-i mezbûr bedel-i misli ve ma‘rifet-i mütevellî ile âhara ferağ ve bedel-i mezbûr i‘mâl ve sagīrân-ı mezbûrâna infâk ve iksâ olunmak sagīrân-ı mezbûrâna min-külli’l-vücûh enfa‘ ve evlâ ve elyak olmağla hakīkat-ı hâl vukūf-ı tammı olan bî-garaz Müslimînden istihbâr olunup haberleri tahrîr ve kıbel-i şer‘den ber-vech-i meşrûh izin verilmek bi’l-vesâye murâdımdır dedikde hakīkat-ı hâl zeyl-i kitâbda isimleri mastûr Müslimînden istihbâr olundukda fi’l-vâki‘ husûs-ı mezbûr bi’l-cümle vasiyy-i mezbûrun bâlâda takrîr ve beyân eylediği vech üzere idiği zâhir ve mütehakkık olmağın vasiyy-i mezbûre Hanife Hatun’a kıbel-i şer‘den izin-birle mâ-hüve’l-vâki‘ bi’t-taleb ketb olundu. Fî 7 Cumâdelâhire sene [1]143. Şuhûdü’l-hâl: Mahalle-i mezbûre müezzini Süleyman Halîfe b. Mehmed, Osman Çelebi b. Ali, el-Hâc Mehmed Ağa b. Abdullah, Ahmed Beşe b. Süleyman, Mehmed Çelebi b. İbrahim, Mustafa Çelebi b. Süleyman, Ahmed Çelebi b. Hasan, Abdullah Çelebi b. Mustafa.