Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 238 Hüküm no: 219 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ziştovi mukataasından dolayı zimmetine para geçirdiği iddiasıyla Kavala kalesine hapsedilen Abdullah Ağa’nın suçsuz olduğu Vilâyet-i Rumeli’nde vâki‘ Ziştovi mukāta‘asına bundan akdem mutasarrıf olup Akbıyık Mahallesi sükkânından Osman Ağa b. Mehmed nâm kimesne meclis-i şer‘-i şerîf-i enverde mârru’z-zikr Ziştovi ahâlîsinden Abdullah Ağa b. el-Hâc Mehmed Ağa b. Osman tarafından husûs-ı âti’z-zikri tasdîka vekîl olduğu yine mârru’z-zikr Ziştovi ahâlîsinden el-Hâc Hüseyin Ağa b. el-Hâc Mehmed ve el-Hâc Osman Ağa b. Abdullah şehâdetleriyle şer‘an sâbit olan râfi‘i hâzihi’l-vesîka Halil Bey b. Mustafa mahzarında takrîr-i kelâm ve bast-ı merâm edip zikrolunan mukāta‘a mâlından ma‘lûmü’l-esâmî re‘âyâ zimmetlerinde olan dört bin üç yüz yirmi dokuz guruşumu mezbûr Abdullah Ağa bi-gayr-ı hakkın ahz u kabz etmişidi deyü tahsîli bâbında vârid olan fermân-ı âlî-birle müvekkil-i mezbûr Kavala kal‘asında kal‘a-bend olmuş idi hâlâ meblağ-ı mezbûrdan müvekkil-i mezbûr Abdullah Ağa’nın nesne ahz u kabz etmediği yakīnen ma‘lûmum olup ben dahi mârru’z-zikr Ziştovi’ye gelmek murâd etmemle husûs-ı mezkûre müte‘allika müvekkil-i mezbûr Abdullah Ağa ile vechen mine’l-vücûh ve sebeben mine’l-esbâb da‘vâ ve nizâ‘ ve husûmetim yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 6 Cumâdelâhire sene [1]143. Şuhûdü’l-hâl: Umdetü’l-kuzât Ahmed Efendi b. İbrahim, el-Hâc Hüseyin Ağa b. el-Hâc Mehmed, el-Hâc Osman Ağa b. Abdullah, İbrahim Ağa b. Derviş, Za‘îm el-Hâc Hüseyin Ağa, Servili Hacı Hüseyin Ağa, el-Hâc Ahmed Ağa, Mustafa Çelebi.