Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 303 Hüküm no: 495 Orijinal metin no: [47b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çavuş’un, Kartal’daki çiftliklere evler yapıp, ortak kullanım alanlarına el koyduğu Oldur ki Kartal nâm karye zimmîleri cemî‘an Âsitâne-i sa‘âdet’e varıp karyemizde çiftliklere evler binâ eden Dergâh-ı âlî çavuşlarından kıdvetü’l-emâsil ve’l-akrân Hüseyin Çavuş mîrî kireç dökecek yeri ve gemiler urgan bağlayıp ve âyende ve revende teneffüs edicek yeri havlusunun içine alıp küllî zulm eyledi dediklerinde husûs-ı mezbûrun istimâ‘ı Dergâh-ı âlî çavuşlarından kıdvetü’l-akrân İsmail Çavuş mübâşeretiyle efendi hazretlerine hitâben emr-i şerîf vârid olup ber mûceb-i emr-i âlî mahall-i mezbûrun üzerine varılıp merkūm Hüseyin Çavuş’un içeri havlusu olduğu yerin kal‘ına ber mûceb-i şer‘-i şerîf hükm olundukdan sonra zikr olunan yerin kal‘ı için karye-i mezbûre ahâlîsi talebleriyle Mevlânâ Ahmed Halîfe irsâl olunup vardıklarında karye-i mezbûre ahâlîsi cemî‘an rızâlarıyla mezbûr Hüseyin Çavuş’un deryâdan cânibde olan kuyunun sol cânibinde olan mermer direkten pınara ve pınardan tarîk-i âm kurbunda olan havlu dibinden üzüm asmasına varınca sınır ta‘yîn edip bu zikr olunan gözün hâricinde evler ve sâir binâ her ne vâki‘ olursa yıkıldığına râzıyız dediklerinde merkūm Hüseyin Çavuş dahi kabûl edip tarafeynin rızâsını mevlânâ-yı merkūm haber vermeğin bu hurûf ber sebîl-i temessük ketb u tahrîr olunup yed-i tâlibe vaz‘ u def‘ olundu ki lede’l-iktizâ kāti‘-i kîl u kāl ola. Tahrîren fî evâsıtı şehri Ramazâni’l-mübârek sene elf mine’l-hicreti’n-nebeviyye. Şuhûdü’l-hâl: Fahrü’l-akrân Mehmed Üstâd-ı hadîka, Mustafa Bey ve Metropolid ve Papa Kosta ve gayruhüm