Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 239 Hüküm no: 220 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafize bt. Mehmed ile es-Seyyid Ömer Efendi b. Osman’ın muhala‘a yoluyla boşandıkları Mahmiye-i İstanbul’da eş-Şeyh Ebu’l-Vefâ kurbünde Molla Hüsrev Mahallesi sâkinelerinden Hâfize bt. Mehmed nâm hatun zâtı ba‘de’t-ta‘rîfi’ş-şer‘î meclis-i şer‘-i hatîr-i lâzımü’t-tevkīrde zevc-i muhâla‘ı işbu bâ‘isü’l-kitâb es-Seyyid Ömer Efendi b. Osman muvâcehesinde ikrâr-ı tâm ve takrîr-i kelâm edip mezbûr es-Seyyid Ömer Efendi zimmetinde mütekarrir ve ma‘kūdun-aleyh olan yüz yirmi bin akçe mehr-i müeccelimin ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzere mezbûr es-Seyyid Ömer Efendi ile muhâla‘a-i sahîha-i şer‘iyye ile hul‘ olduğumda ol dahi hul‘-ı mezbûru ba‘de’l-kabûl hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik dedikde gıbbe’t-tasdîkı’l-mu‘teberi’l-vicâhî mâ-hüve’l-vâki‘ bi’t-taleb ketb olundu. Fi’l-yevmi’l-âşir min-Cemâziyelâhir sene [1]143. Şuhûdü’l-hâl: Hasan Çelebi b. el-Hâc Hüseyin, Kayyum İbrahim Efendi b. Ahmed, Abdülbâki b. Osman, İbrahim Ağa b. Halil, Ahmed b. Mehmed, Mehmed b. Ali, Müezzin İbrahim Efendi b. Halil, İmâm Şehzâde Süleyman Efendi, es-Seyyid Ahmed b. Şa‘ban, el-Hâc Bekir b. Ali, Mustafa b. Ali, Ahmed Bey b. Ömer, Halil Beşe b. Mahmud, Mehmed Beşe b. Ali, Ali b. Ahmed, Hasan b. Hüseyin, Süleyman Çavuş b. Mustafa.