Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 310 Hüküm no: 509 Orijinal metin no: [48b-6] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gazanfer Bey’in atını Derviş Çavuş’un hizmetkârlarının çalıp kaçtığı Budur ki Gazanfer Bey ez-zaîm mahfil-i kazâda Dergâh-ı âlî çavuşlarından fahrü’l-akrân Derviş Çavuş mahzarında takrîr-i da‘vâ edip bundan akdem sâkin olduğum yerde bir atım zâyi‘ olup mezbûrun üç nefer hizmetkârları ki birinin adı Keyvan ve Receb ve birinin adı ma‘lûmum değildir onlardan zan edip benim atımı hizmetkârların ahz eyledi zan ederim dedikde ben üç nefer hizmetkârıma kefîlim her ne zamânda dilersen şer‘a ihzâr edeyim demiş idi hâlâ mezbûrân Keyvan ve Receb firâr eyleyip biri gayb eyledi merkūm Derviş Çavuş’dan taleb ederim dedikde gıbbe’s-suâl ve akībe’l-inkâr udûl-i müslimînden Nebi b. İbrahim ve Hamza b. Hasan nâm kimesneler edâ-yı şehâdet-i şer‘iyye edip fi’l-hakīka mezbûr Gazanfer Bey atımı hizmetkârların ahz eylediler zan ederim dedikde bu üç nefer hizmetkârıma kefîlim her ne zamânda dilersen sana teslîm edeyim dedi bu husûsa şâhidleriz şehâdet ederiz dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ olup mâ vaka‘a bi’t-taleb tahrîr olundu. Şuhûdü’l-hâl: Mehmed b. Behrâm, Müstedâm Bey el-cündî, Hasan b. Sâdık, Mehmed b. Habîb ve gayruhüm