Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 310 Hüküm no: 510 Orijinal metin no: [49a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Paşa Vakfı’na ait tamir edilecek odaların masraflarının belirlenmesi Budur ki Merhûm el-Hâc Ahmed Paşa hazretlerinin evkāfına bi’l-fi‘l mütevellî olan seyyidetü’l-muhadderâti’l-mu‘azzam iklîletü’l-muhassenâti’l-mükerrem sâfiyyetü’s-sıfât kudsiyyetü’d-derecât netîcetü’l-âlî ve’s-sa‘âdâtü’l-manzûr bi celâyili ni‘amillâhi’l-meliki’l-mennân hazret-i Gevher Hân Sultan bt. el-Hâc Paşa tarafından vekîl-i şer‘î olan fahrü’l-akrân Derviş Çelebi mahfil-i kazâya gelip merkūm-ı mezbûrun mahrûse-i Üsküdar’da olan evkāfından Mehmed Paşa mahallesinde vâki‘ fırının kurbunda olan odaların ba‘zı yeri harâba müşrif olup ta‘mîr ve termîm olunması ve fırın dahi harâb olup amel mânde olmuşdur onun dahi müceddeden binâ olunması fırının bi’l-külliye harâb olan ahırı ve değirmen yerini müceddeden binâ olunması lâzımdır üzerine varılıp ne mikdâr akçe ta‘mîr ve binâ olunur tahmîn-i sahîh ile tahmîn olunmasını taleb ederim dedikde hâssa mi‘mârlardan Üstâd Ali ve Yorgi ve mahkeme kâtibi Mevlânâ Mehmed irsâl olunup zeyl-i kitâbda ismi mastûr olan Müslümanlar ile mahall-i merkūma vardıklarında zikr olunan odaların ta‘mîre muhtâc olan yerlerine sarf olunacak pelit tahtası ve eğrisi ve pedavra ve pedavra eğrisi ve kiremidi ve tuğla duvarı ve üstâdiye ve ırgâdiyesi bin sekiz yüz kırk akçe ile ancak olur ve bi’l-külliye harâb olan bennâ zirâ‘ıyla tûlü ve arzı üç yüz zirâ‘ bir ahır ve değirmen yeri binâ olunmak her zirâ‘ eski kerestesi dahi sarf olunmak üzre yetmişer akçe hesâbı üzere cem‘an yirmi bir bin akçe ile ancak olur ve zikr olunan fırın müceddeden sofasıyla dört bin akçe ile ancak olur ve çarşı yüzünde olan dükkânların türâbiyeleri ve saçağı ve sâir meremmete muhtâc olan yerleri bin dört yüz on akçe ile ancak olur deyu tahmîn-i sahîh ile tahmîn eylediklerinde mevlânâ-yı merkūm haber vermeğin bu hurûf ber sebîl-i temessük ketb olundu. Şuhûdü’l-hâl: Mustafa b. Abdullah, Hasan b. Timurhan, Mustafa b. Abdullah, Ali b. Himmet, Muttalib b. Süleyman, Kasım Bey b. Abdullah ve gayruhüm