Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 240 Hüküm no: 222 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Elini bt. Dimitraşko v. Yani’nin Balat’taki evini Kudüs fukarası için vakfettiği Mahmiye-i İstanbul’da Balat kurbünde Tahtaminâre Mahallesi mütemekkinlerinden Elini bt. Dimitraşko v. Yani nâm Nasrâniye tarafından zikri âtî menzili vakf ve tescîl ve husûmet ve redd-i cevâba vekîl olduğu zât-ı mezbûreyi ârifân olan mahalle-i mezbûre imâmı vekîli el-Hâc Hüseyin Halîfe b. Ahmed ve Berber Hasan Beşe b. Mustafa şehâdetleriyle sâbit olan Kostantin v. Dimitri nâm zimmî meclis-i şer‘-i hatîr-i lâzımü’t-tevkīrde vakf-ı âti’z-zikre li-ecli’t-tescîl mütevellî nasb olunan hâlâ Kuds-i şerîf mütevellîsi Haris Tantos v. Ağaloz nâm râhibin mahmiye-i mezbûrede vekîli olan Papa Maltiyoz v. İstriyoz nâ[m] râhib muvâcehesinde bi’l-vekâle ikrâr ve takrîr-i kelâm edip vakf-ı âti’z-zikrin sudûruna değin müvekkilem mezbûre Elini Nasrâniyenin yedinde mülk ve hakkı olup mahalle-i mezbûrede vâki‘ iki tarafdan dülger halîfelerinden Pavlo zimmî menzilleri ve bir tarafdan tarîk-i hâs ve bir tarafdan tarîk-i âm ile mahdûd tûlen ve arzen bi-hesâb-ı terbî‘i iki yüz yirmi zirâ‘ arsa üzerine mebnî iki bâb fevkānî oda ve bir matbah ve dehlîz ve bir bâb tahtânî oda ve bodrum ve kömürlük ve kenîf ve bi’r-i mâ’yı müştemil mülk menzilini müvekkilem mezbûre Elini vakf-ı sahîh-i müebbed ve habs-i sarîh-i muhalled ile vakf ve habsedip şöyle şart ve ta‘yîn eyledi ki menzil-i mahdûd-ı mezkûrda kendim sâkine olup ba‘de’l-helâk menzil-i mezbûr Kuds-i şerîf mütevellîleri yediyle icâre-i mu‘accele ve müeccele-i misliyye ile âhara îcâr olunup hâsıl olan galle ve nemâsı Kuds-i şerîf fukarâlarına harc ve sarf oluna ve vakf-ı mezbûrun hasbî tevliyeti Kuds-i şerîf mütevellîsi her kim olursa ona meşrûta ola deyü şart ve ta‘yîn edip menzil-i mezbûru fâriğân ani’ş-şevâgil mütevellî-i mezbûra def‘ ve teslîm ol dahi vakfiyet üzere kabz ve tesellüm eyledi dedikde gıbbe’t-tasdîkı’ş-şer‘î vekîl-i mezbûr kelâmını cânib-i şikāka sarf edip vakf-ı akār İmâm-ı A‘zam hazretleri katında sahîh-i gayr-ı lâzım olmağla vakf-ı mezbûrdan bi’l-vekâle rücû‘ ve menzil-i mezbûru kemâ-fi’l-evvel müvekkilem mezbûrenin mülküne istirdâd ederim dedikde mütevellî-i mezbûr cevâb verip eğerçi hâl bast olunan minvâl üzeredir lâkin imâmeyn-i hümâmeyn mezheb-i şerîflerinde sıhhat-i lüzûmu müstelzimedir deyü red ve teslîmden imtinâ‘ ve bu bâbda nizâ‘ ve hâkim-i hâsim -esbaga’llâhu ni‘amehû aleyh- hazretleri huzûrunda müterâfi‘ân ve her biri fasl u hasma tâlibân olduklarında hâkim-i müşârun-ileyh hazretleri dahi ba‘de’t-teemmül cânib-i vakfı evlâ görüp imâmeyn-i müşârun-ileyhimâ mezheb-i şerîfleri üzere vakf-ı mezbûrun sıhhat ve lüzûmuna hükm-i sahîh-i şer‘î ve kazâ-i sarîh-i mer‘î etmeğin min-ba‘d vakf-ı mezbûr sahîh ve lâzım olup naks ve nakzına mecâl muhâl oldu. Cerâ zâlike ve hurrire fi’l-yevmi’s-sâmin min-Cemâziyelâhir sene 1143. Şuhûdü’l-hâl: El-hâc Hüseyin Çelebi b. Ahmed vekîl-i imâm, Mustafa Çelebi b. Süleyman, Hasan Beşe b. Mustafa, Rahmetullah Beşe b. Yusuf, Sahaf Ali Efendi b. Mustafa, Hüseyin b. Hasan, Berber Hasan Beşe b. Mustafa, Ali Beşe b. Osman, Pavlo v. Sefer, Yorgaki v. Zafiri, Dimitri v. Yorgaki, Zuhuri v. Yano, Kürkçü Yanaki.