Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 241 Hüküm no: 223 Orijinal metin no: [47b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Papa Maltiyoz v. İstiryoz’un Elini bt. Dimitraşko’daki alacağından vazgeçtiği Husûs-ı âti’l-beyânın mahallinde ketb ü tahrîri için bi’l-iltimâs savb-ı şer‘-i kavîmden irsâl olunan Mevlânâ es-Seyyid Fazlullah Efendi b. el-merhûm Abdülkerim Efendi Mahmiye-i İstanbul’da Tahtaminâre Mahallesi’nde mütemekkine Elini bt. Dimitraşko nâm Nasrâniyenin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde yine mahalle-i mezbûre mütemekkinlerinden Papa Maltiyoz v. İstriyo[z] nâm zimmî meclis-i ma‘kūd-ı mezkûrda zâtı ta‘rîf-i şer‘î ile mu‘arrefe olan bâ‘isetü hâzihi’l-vesîka mezbûre Elini muvâcehesinde ikrâr-ı tâm ve takrîr-i kelâm edip mezbûre Elini Nasrâniye bundan akdem yedimden üç yüz yirmi guruş istidâne ve kabz ve mesârifine sarf ile istihlâk etmişidi hâlâ meblağ-ı mezbûr üç yüz yirmi guruş mütâlebesinden mezbûre Elini Nasrâniyenin zimmetini ibrâ-i âmm-ı râfi‘u’l-hısâm ile ibrâ ve iskāt eylediğimde ol dahi ibrâ-i mezbûru kabûl etmekle min-ba‘d meblağ-ı mezbûra müte‘allika mezbûre Elini Nasrâniye ile vechen mine’l-vücûh kat‘â da‘vâ ve nizâ‘ ve husûmetim kalmamışdır dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Ali b. Mustafa ve Muhzır Hüseyin b. Hasan ile meclis-i [48a] şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâmin min-Cemâziyelâhir sene [1]143. Şuhûdü’l-hâl: el-Hâc Hüseyin Çelebi b. Ahmed vekîl-i imâm, Mustafa Çelebi b. Süleyman, Berber Hasan Beşe b. Mustafa, Rahmetullah Beşe b. Yusuf, Sahaf Ali Efendi b. Mustafa, İbrahim Çelebi b. Mehmed, Ali Beşe b. Osman, İbrahim Çelebi b. Mehmed, Pavlo v. Sefer, Yorgaki v. Zafiri, Dimitri v. Yorgaki, Zuhuri v. Yani, Kürkçü Yanaki v. ( ).