Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 242 Hüküm no: 224 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Zülfikar ile Fazlızâde Mehmed Efendi b. Mehmed Efendi’nin aralarındaki alacak davasında sulh oldukları Vilâyet-i Rumeli’de Niğbolu a‘mâlinden Selvi kazâsı ahâlîsinden olup mahmiye-i İstanbul’da merhûm Sultan Mehmed Hân -tâbe serâhu- Câmi‘-i şerîfi kurbünde müsâfiren sâkin Hüseyin Ağa b. Zülfikār nâm kimesne meclis-i şer‘-i şerîf-i enverde sâbıkā imâm-ı sultânî umdetü’l-mevâli’l-izâm Abdurrahman Efendi hazretlerinin kethüdâlıkları hizmetleriyle şeref-yâb olan eşrâf-ı kuzât-ı Mısriyye’den Fazlızâde demekle şehîr mefharü’l-kuzât Mehmed Efendi b. Mehmed Efendi taraflarından husûs-ı âti’l-beyâna vekîlleri olduğu el-Hâc Ebûbekir b. Abdullah ve Süleyman Beşe b. Ahmed şehâdetleriyle sâbit ve sübût-ı vekâletine hükm-i şer‘î lâhık olan Ali Efendi b. Hüseyin mahzarında ikrâr ve takrîr-i kelâm edip bundan akdem bir husûsun temşiyyeti’çün müvekkil-i mûmâ-ileyh Fazlızâde Efendi’ye bi-tarîkı’r-rüşve mâlımdan dokuz yüz guruş def‘ ve teslîm ol dahi ber-vech-i muharrer yedimden ahz u kabz etmeğin hâlâ meblağ-ı mezbûru müvekkil-i mûmâ-ileyhden taleb ve da‘vâ eylediğimde ol dahi benden iki bin beş yüz guruş da‘vâ etmekle beynimizde nizâ‘-ı küllî cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden beni müvekkil-i mûmâ-ileyh Fazlızâde Efendi ile iki yüz elli guruş üzerine sulh eylediklerinde ben dahi sulh-ı mezkûru kabûl ve bedel-i sulh-ı mezkûr iki yüz elli guruşu yedinden ahz u kabz eylediğimden sonra mâ‘adâ altı yüz elli guruşa ve târih-i kitâba gelince sâir beynimizde cereyân eden ahz u i‘tâya müte‘allika âmme-i de‘âvî ve mütâlebâtdan ben müvekkil-i mûmâ-ileyh Fazlızâde Efendi’yi ibrâ-i âm ile ibrâ ve iskāt eylediğimde onlar dahi bedel-i sulh olmak üzere bana medfû‘ları olan meblağ-ı mezbûr iki yüz elli guruşa ve benden müdde‘âları olan meblağ-ı mezbûr iki bin beş yüz guruşa ve ber-vech-i muharrer târih-i kitâba gelince sâir beynimizde cereyân eden ahz u i‘tâya müte‘allika âmme-i da‘vâdan beni ibrâ ve iskāt eylediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 Cumâdelâhire sene [1]143. Şuhûdü’l-hâl: Mehmed Çavuş el-mübâşir, Halil Ağa b. Mustafa, el-Hâc Ebûbekir b. Abdullah, Süleyman Beşe b. Ahmed.