Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 325 Hüküm no: 547 Orijinal metin no: [51b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey b. Bülbül’ün, Mustafa Paşa Vakfı’ndan aldığı borcu karşılık evinin satılıp borcun tahsil edildiği Mahrûse-i Üsküdar’a tâbi‘ kasaba-i Gekvize’den olup hâlâ Mısır’da sipâhi zümresinden Ali Bey b. Bülbül nâm kimesne tarafından nehc-i şer‘î üzre husûs-ı âtîye vekâleti sâbit olan el-Hâc Fazlı b. Memi nâm kimesne mahfil-i kazâda kasaba-i merkūmeden Musa b. Ahmed nâm kimesne Mehmed b. Hacı Efendi mahzarında ikrâr ve takrîr-i merâm kılıp merkūm Ali Bey’in merhûm ve magfûrun-leh Mustafa Paşa evkāfına olan bin akçe deyni için kasaba-i mezbûrede inde’l-cîrân ma‘lûmü’l-hudûd menzilinin içinde on bir bâb çatmasını bin râyic fi’l-vakt nakid akçeye bât ile bey‘ edip kabz-ı semen ve teslîm-i mebî‘ kıldım dedikde mukırr-ı mezbûrun vech-i meşrûh üzre olan ikrârını mukarrun lehü’l-merkūm vicâhen ve şifâhen tasdîk eylediği kayd şud. Şuhûdü’l-hâl: Mehmed b. Habîb, Mahmud b. Abdullah, Hasan b. Yusuf, Sefer b. Abdullah, Hasan b. Sâdık ve gayruhüm