Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 243 Hüküm no: 225 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İzdin kazasına bağlı Dimyan köyünde Kostantin v. Aleksi’nin evine zorla giren Mühtedî Mehmed b. Abdullah’ın bu köyde oturmamayı taahhüt ettiği Vilâyet-i Rumeli’de İzdin kazâsına tâbi‘ Dimyan nâm karye ahâlîsinden olup mahmiye-i İstanbul’da Tavukpazarı kurbünde müsâfiren sâkin işbu hâfızü’l-vesîka Kostantin v. Aleksi nâm zimmî meclis-i şer‘-i şerîf-i enverde karye-i mezbûre ahâlîsinden Mehmed b. Abdullah nâm mühtedî muvâcehesinde üzerine da‘vâ ve takrîr-i kelâm edip mezbûr Mühtedî Mehmed târih-i vesîkadan iki ay mukaddem âlet-i harble karye-i mezbûrede vâki‘ menzilime bi-gayr-ı hakkın girip ehl ü ıyâlimi tahvîf ve ırzımı hetk etmişdir bu makūle fesâd etmek âdet-i müstemirresidir hakīkat-ı hâl ve sıdk-ı makāl işbu hâzirûn bi’l-meclis karye-i mezbûre ahâlîsinden istihbâr olunmak murâdımdır dedikde mezbûr mühtedî Mehmed inkâr etmeğin karye-i mezbûre ahâlîsinden olup li-ecli’l-ihbâr meclis-i şer‘a hâzirûn olup Mustafa Ağa b. Ahmed ve İsmail Ağa b. Süleyman ve sâir mazbûtü’l-esâmî on beş nefer kimesnelerden istihbâr olundukda fi’l-vâki‘ mezbûr Mühtedî Mehmed târih-i vesîkadan iki ay mukaddem müdde‘î-i mezbûr Kostantin’in âlet-i harble bi-gayr-ı hakkın menziline girip ehl ü ıyâlini tahvîf ve ırzını hetk etmişdir bu makūle fesâd etmek âdet-i müstemirresidir deyü her biri muvâcehesinde alâ-tarîkı’ş-şehâde [48b] sû-i hâlini haber verip mûcebince şer‘an tağyîr ve fîmâ-ba‘d bu makūle fesâd etmemek üzere kıbel-i şer‘den ba‘de’t-tenbîh mezbûr Mühtedî Mehmed ba‘de’l-yevm karye-i mezbûrede sâkin olmamak üzere ta‘ahhüd etmeğin işbu vesîka ketb ve terkīm ve yedine i‘tâ olundu. Fî 8 Cumâdelâhire sene [1]143. Şuhûdü’l-hâl: Mustafa b. Ahmed, İsmail b. Süleyman, Mehmed b. Abdullah, Mehmed b. Ahmed, İbrahim b. Mustafa.