Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 243 Hüküm no: 226 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Abdullah’ın boşandığı kocası el-Hâc Mehmed b. Hızır üzerine açtığı eşya davasını delillendiremediği Mahmiye-i İstanbul’da Kabasakal Mahallesi sâkinelerinden olup zâtı ta‘rîf-i şer‘î ile mu‘arrefe olan Fâtıma bt. Abdullah nâm hatun meclis-i şer‘-i hatîr-i lâzımü’t-tevkīrde zevc-i mutallıkı bâ‘isü hâzihi’l-vesîka el-Hâc Mehmed b. Hızır nâm kimesne mahzarında üzerine da‘vâ ve takrîr-i kelâm edip mezbûr el-Hâc Mehmed zevcim olup târih-i vesîkadan on gün mukaddem bâyinen beni tatlîk etmekle zimmetinde mütekarrir ve ma‘kūdun-aleyh olan bin akçe mehr-i müeccelim ve nafaka-i iddet-i mu‘ayyene-i ma‘lûmem ve meûnet-i süknâm için bi’t-terâzî ta‘yîn olunan iki yüz akçe ki cem‘an bin iki yüz akçeyi bana def‘ ve teslîm ben dahi yedinden tamamen ahz u kabz etmişidim lâkin mezbûr el-Hâc Mehmed eşyâ-i memlûkemden mecmû‘u yirmi guruş kıymetli on zirâ‘ bürüncek bez ile Tire kenarlı bir gömlek ve yirmi dört zirâ‘ kaba kettân bezi ve iki kettân tarağı ve bir hatâyî kavuşdurma ve bir hamam peştamâlim ile üç yüz akçe kıymetli bir aded cedîd İstanbul altınımı bi-gayr-ı hakkın ahz etmekle suâl olunup eşyâ-i mezbûre mevcûd ise aynını müstehleke ise ba‘de’s-sübût kıymet-i şer‘iyyelerini bana teslîme tenbîh olunmak murâdımdır dedikde gıbbe’s-suâl mezbûr el-Hâc Mehmed cevâbında fi’l-hakīka müdde‘iyye-i mezbûre ber-vech-i muharrer zevce-i mutallakası olduğunu ikrâr lâkin eşyâ-i mezbûre ile mârru’z-zikr bir aded altın kabzını bi’l-külliye inkâr etmekle müdde‘iyye-i mezbûreden müdde‘âsına mutâbık beyyine taleb olundukda ol dahi ityân-ı beyyineden izhâr-ı acz ile istihlâf etmeğin fi’l-hakīka müdde‘iyye-i mezbûrenin ber-vech-i meşrûh eşyâ-i memlûkesinden mecmû‘u yirmi guruş kıymetli on zirâ‘ bürüncek bezi ile bir gömlek ve yirmi dört zirâ‘ kaba kettân bezini ve iki kettân tarağı ve bir hatâyî kavuşdurma ve bir hamam peştamâlini ve üç yüz akçe kıymetli bir aded cedîd İstanbul altınını ahz edip ol vechile müdde‘iyye-i mezbûreye reddi lâzım zimmetinde nesne hakkı olmadığına merkūm el-Hâc Mehmed’e yemîn teklîf olundukda ol dahi hasbe’l-mesûl yemîn bi’llâhi te‘âlâ etmeğin mûcebince müdde‘iyye-i mezbûre Fâtıma Hatun bilâ-beyyine bî-vech mu‘ârazadan men‘-birle mâ-vaka‘a bi’t-taleb ketb olundu. Fî 3 min-Cumâdelâhire sene [1]143. Şuhûdü’l-hâl: İmâm Ahmed Efendi b. el-Hâc Halil, el-Hâc İbrahim b. Abdullah, Molla Mustafa b. Mahmud, Ahmed Beşe b. Mehmed, Mehmed Ağa b. Süleyman, el-Hâc Hasan b. Receb, Ali Beşe b. Şa‘ban, el-Hâc Hüseyin b. Ahmed, Sahaf Abdullah Efendi b. Hacı Halil, Du‘âcı İbrahim b. Mustafa.