Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 334 Hüküm no: 568 Orijinal metin no: [53b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed b. İsa’nın, Hasan’dan satın aldığı ata Hancı Hasan b. Abdullah’ın kefil olduğu Budur ki Ahmed b. İsa nâm kimesne mahfil-i kazâda mahrûse-i Üsküdar’da vâki‘ merhûm el-Hâc Ahmed Paşa hazretlerinin vakıf hânının müste’ciri olan Hancı Hasan b. Abdullah nâm kimesneyi ihzâr ve mahzarında takrîr-i da‘vâ edip bundan akdem benim yedimden Celal Bey el-cündî kendi mülkü idiğini isbât edip ber mûceb-i şer‘-i şerîf aldığı al atı mezbûr Celal Bey’in hizmetkârı Hasan nâm emredden aldığım zamânda zikr olunan atı bey‘a ağasının izni var mıdır dedikde mezbûr Hancı Hasan mezbûrun ağası bu at merkūm emred Hasan’ındır dilerse bey‘ eylesin her nice dilerse eyle eylesin dedi sen al zararına ben kefîlim dedi ben dahi mezbûr Hancı Hasan’ındır kefâletiyle on yedi altına aldım meblağ-ı mezbûru merkūm Hancı Hasan’dan taleb ederim dedikde gıbbe’s-suâl ve akībe’l-inkâr udûl-i müslimînden Ahmed b. Süleyman ve Davud b. Kaytas nâm kimesneler edâ-yı şehâdet-i şer‘iyye edip fi’l-hakīka mezbûr emred Hasan zikr olunan atı merkūm Ahmed’e bey‘ etmek istedikde mezbûr dahi ağasının izni var mıdır deyu almak istemedikde Hancı Hasan bu atı ağası mezbûr Hasan’ındır dilerse bey‘ eylesin dilerse her nice eyle eylesin dedi ben zararına kefîlim dedi bu husûsa şâhidleriz şehâdet ederiz dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ olup mâ vaka‘a bi’t-taleb tahrîr olundu. Tahrîren fî evâsıtı Şevvâli’l-mükerrem sene elf. Şuhûdü’l-hâl: Ahmed Halîfe el-müstaid, Mehmed Subaşı an zümre-i yayabaşıyân-ı hâssa, Hüseyin b. Resûl, Hasan b. Hamza ve gayruhüm