Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 244 Hüküm no: 227 Orijinal metin no: [48b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katır iştirasından dolayı Mustafa Ağa b. el-Hâc Mehmed ile Kastamonu sancağının Küre-i nühas kazasına tâbi Karayazıcılar ve Nasreddin köyleri halkının aralarındaki davada sulh oldukları Fi’l-asl vilâyet-i Anadolu’da Kastamonu sancağında Küre-i nuhâs kazâsına tâbi‘ Karayazıcılar nâm karye ahâlîsinden Ahmed b. Abdullah nâm kimesne kendi asâleten ve Zünnun Halîfe ve Seydî Beşe b. Mehmed b. İbrahim taraflarından husûs-ı âti’z-zikri ikrâra vekîlleri olduğu Musa b. Ahmed ve Hüseyin b. İsmail nâm kimesneler şehâdetleriyle şer‘an sâbit olan mezbûr Ahmed vekâleten ve yine kazâ-i mezbûra tâbi‘ Nasreddin nâm karye ahâlîlerinden Salih b. Osman ve Abdülgaffar b. Mustafa nâm kimesneler meclis-i şer‘-i hatîrde işbu sâhibü’l-kitâb Mustafa Ağa b. el-Hâc Mehmed mahzarında her biri asâleten ve vekâleten ikrâr ve takrîr-i kelâm edip mezbûr Mustafa Ağa’nın [bin] yüz kırk bir senesinde bâ-fermân-ı âlî katır iştirâsına memûr olduğunda kazâ-i mezbûreye gelip ber-mûceb-i defter iki bin dört yüz otuz beş guruş isâbet edip meblağ-ı mezbûrdan yedi yüz yetmiş guruş karyenize isâbet eyledi deyü mezbûr Mustafa meblağ-ı mezbûru bizden bi-gayr-ı hakkın ahz u kabz etmekle hâlâ meblağ-ı mezbûr yedi yüz yetmiş guruşu mezbûr Mustafa Ağa’dan bi’l-asâle ve bi’l-vekâle taleb ve da‘vâ sudûrunda olmuşidik el-hâletü hâzihî beynimize muslihûn tavassut edip da‘vâ-yı mezkûremizden bizi mezbûr Mustafa Ağa ile üç yüz yetmiş guruş üzere sulh eylediklerinde biz dahi sulh-ı mezbûru kabûl ve bedel-i sulh olan meblağ-ı mezbûr üç yüz yetmiş guruşu mezbûr Mustafa Ağa yedinden bi’l-asâle ve bi’l-vekâle tamamen ahz u kabz edip mâ‘adâsına müte‘allika âmme-i da‘vâdan mezbûr Mustafa Ağa’nın zimmetini her birimiz asâleten ve vekâleten ibrâ ve iskāt eylediğimizden sonra mezbûr Mustafa Ağa dahi kezâlik bize medfû‘u olan meblağ-ı mezbûr üç yüz yetmiş guruşa müte‘allika âmme-i da‘vâdan bizim zimmetimizi ibrâ ve iskāt eyledi dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 13 min-Cumâdelâhire sene [1]143. Şuhûdü’l-hâl: Mustafa b. Mehmed, Süleyman Ağa b. Hasan, Ahmed b. Mehmed, Mahmud b. Mehmed, Halil Efendi b. Mahmud, İsa b. Abdullah, Ali b. Abdullah, [49a] Hasan b. el-Hâc Mehmed, Ahmed Ağa b. el-Hâc Mehmed, Berber İbrahim, el-Hâc Mustafa b. İbrahim, Abdi b. Ali, Tahtacı Mehmed Çelebi b. Abdullah, Salih Çelebi b. Süleyman, Yahya Efendi b. Abdülhay Efendi.