Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 245 Hüküm no: 228 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şark seferi dolayısıyla Küre-i nühas kazası ahalisinden toplanıp sonra ödenmesi ferman olunan paranın kaza emini olan Mustafa Ağa tarafından halka ödendiği Vilâyet-i Anadolu’da vâki‘ Küre-i nuhâs kasabası ahâlîsinden Recebzâde Halil Ağa b. Receb ve Osman Çelebizâde demekle şehîr Mustafa Çelebi b. Mehmed ve Mustafa Ağa b. Mustafa ve kazâ-i mezbûreye tâbi‘ Mancılık dîvânı ahâlîsinden Hacı Ahmed oğlu Musa ve Bozarmut nâm karye ahâlîsinden Halil b. Mehmed nâm kimesneler asâleten ve Kepez nâm karye ahâlîsinden Hatîb Ali Halîfe b. Hüseyin b. Abdünnebi tarafından husûs-ı âti’z-zikre vekîl olduğu Ahmed Çelebi b. Mehmed ve Mehmed b. Ebûbekir nâm kimesneler şehâdetleriyle sâbit olan Ahmed b. Mehmed ve yine kazâ-i mezbûre ahâlîsinden es-Seyyid Ali Ağazâde es-Seyyid Ali Ağa b. el-mezbûr es-Seyyid Ali b. es-Seyyid Mehmed’in li-ebeveyn er karındaşı ve tarafından husûs-ı âti’z-zikre kezâlik vekîl-i sâbitü’l-vekâle vekîli es-Seyyid Süleyman Ağa nâm kimesne meclis-i şer‘-i hatîr-i lâzımü’t-tevkīrde bâ‘isü hâzihi’l-vesîka Mustafa Ağa b. Mehmed nâm kimesne mahzarında her biri bi’l-asâle ve bi’l-vekâle ikrâr-ı tâm ve takrîr-i kelâm edip Şark seferi zuhûrundan in‘ikād-ı sulhe gelinceye değin işbu yedimizde olan mümzâ ve mahtûm defter mantûkunca sâkin olduğumuz mârru’z-zikr Küre-i nuhâs kazâsına îcâb eden kırk iki re’s davarlar için mekârîci tâifesinden Nasreddin oğlu Süleyman ve Hüseyin ve Seydî Çelebi ve Deli Abdullah ve Zünnun Halîfe nâm kimesneler mekârî bedeli olmak üzere kazâ-i mezbûre ahâlîsinden bin dört yüz yirmi sekiz guruş ve peşin ücretlerinden dokuz yüz kırk beş guruş ahz ve ol mikdâr davarlar ile edâ-yı hizmet etmek üzere her biri ba‘de’t-ta‘ahhüd esnâ-i râhda firâr ve gaybet edip edâ-yı hizmet etmemeleriyle meblağ-ı mezbûr tefahhus ve kendilerinden tahsîl ve teslîm-i hazîne-i âmire ettirilmek için bundan akdem emr-i celîlü’ş-şân sâdır ve silâhşor-ı sadrâzam-ı sâbık Ömer Ağa nâm kimesne mübâşir ta‘yîn olundukda mezbûrûn mekârîci tâifesine bi’l-cümle ahâlî-i kazâ kefîl olmalarıyla mekârîci tâifesinden ancak yedi yüz kırk guruş tahsîl ve mâ‘adâ bin dokuz yüz otuz üç guruşun dört yüz üç guruşu tenzîl ve mâ‘adâsı olan bin dört yüz guruş ki cem‘an iki bin dört yüz otuz beş guruş bi’l-cümle ahâlî-i kasaba ve kurâlarının a‘yân ve askerî ve re‘âyâ zümresine tevzî‘ ve taksîm ve defter olundukda mezbûr Mustafa Ağa Küre-i nuhâs emîni olduğuna binâen mübâşir-i merkūm ve bi’l-cümle ahâlî-i kazâ ma‘rifetleriyle tahsîldâr nasb ve ta‘yîn ve kıbel-i şer‘den yedine verilen işbu mümzâ ve mahtûm defter mantûkunca her bir neferin hissesine isâbet eden mikdâr meblağı tahsîl ve mübâşir-i merkūma teslîm etmişidi hâlâ meblağ-ı mezbûr taraf-ı devlet-i aliyyeden in‘âm ve ahâlî-i kazâya teslîm olunmak üzere fermân-ı âlîşân sâdır olmağın ber-vech-i muharrer meblağ-ı mezbûrdan ber-mûceb-i defter-i mümzâ bizim hisselerimize isâbet eden ma‘lûmü’l-mikdâr akçeyi merkūm Mustafa Ağa bize red ve teslîm biz dahi yedinden bi’l-vesâye ve bi’l-vekâle tamamen ahz u kabz edip husûs-ı mezbûra müte‘allika âmme-i da‘vâdan mûmâ-ileyh Mustafa Ağa ile mübâşir-i merkūm Ömer Ağa’yı bi’l-asâle ve bi’l-vekâle ibrâ ve iskāt eyledik dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 12 Cumâdelâhire sene [1]143. Şuhûdü’l-hâl: Mehmed Efendi b. Ahmed, Halil Efendi b. Mahmud, Hasan Beşe b. el-Hâc Mehmed, İsa Beşe b. Ebûbekir, Mehmed Çelebi b. Abdullah.