Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 342 Hüküm no: 585 Orijinal metin no: [55b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdal Bey b. Musa’nın, Mahmud Paşa’dan ve kapıcıbaşısı İsmail Ağa’dan alacakları için açtığı davadan vazgeçtiği Şehr-i Zol’dan Abdal Bey b. Musa tarafından husûs-ı âtîyi da‘vâya ve sulha Ferhad b. Hüsam, Çavdar Kethüdâ b. Oruç şehâdetleriyle vekâleti sâbite olan Hüseyin Bey mahfil-i kazâda emîrü’l-ümerâi’l-kirâm kebîrü’l-küberâi’l-fihâm zü’l-kadri ve’l-mecdi ve’l-ihtirâm el-muhtas [bi-]inâyeti’l-meliki’l-a‘lâ sâbıkan Şehr-i Zol beylerbeyisi olan Mahmud Paşa ve mûmâileyh hazretlerinin kapıcıbaşısı fahrü’l-emâsil ve’l-a‘yân İsmail Ağa tarafından şer‘le vekâleti sâbite olan fahrü’z-zu‘emâ Hasan Çelebi b. ( ) mahzarında ikrâr ve takrîr-i merâm kılıp mûmâileyh Mahmud Paşa hazretlerinden altı yüz altın ve yirmi tagar buğday ve on iki arpa ve sekiz tagar darı merkūm İsmail Ağa’dan ba‘zı emti‘a bahâsından cem‘an dört yüz altın ki altmış hesâbı üzre altmış bin akçe nakid ve zikr olunan mikdârı tereke olur bu cemî‘an da‘vâ ve taleb eylemişdim muslihûn tavassutu bizi ıslâh edip elli altın nakid ve bir mor ferâce ve bir at verdiler ben dahi zikr olunan altını ve ferâce ve atı alıp mûmâileyhin ve İsmail Ağa’nın ve mûmâileyhimin müte‘allikāt ve âdemlerinin zimmetlerini da‘vâ-yı mezbûreden ibrâ’-i âmla ibrâ’ ve iskāt eyledim dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-merkūm vicâhen ve şifâhen tasdîk ve tahkīk eyledikde mâ vaka‘a kayd olundu. Şuhûdü’l-hâl: Fahrü’l-cüyûş Yahya Çavuş, Fahrü’l-cüyûş Mehmed Çavuş, Kıdvetü’l-emâsil Feridun Çavuş, Fahrü’l-cüyûş Mehmed Çavuş b. Murad, Fahrü’l-akrân Ömer Çelebi