Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 246 Hüküm no: 229 Orijinal metin no: [49a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. el-Hâc Hızır’ın boşandığı kocası İbrahim Efendi üzerine açtığı alacak davasında tarafların sulh oldukları Sulh. Mahmiye-i İstanbul’da Avratpazarı kurbünde el-Hâc Ahmed Mahallesi sâkinelerinden olup zâtı Molla Ali b. Osman ve Halil b. Yusuf ta‘rîfleriyle mu‘arrefe olan Sâliha bt. el-Hâc Hızır nâm hatun meclis-i şer‘-i şerîf-i enverde zevc-i sâbıkı işbu bâ‘isü’l-kitâb İbrahim Efendi b. Mustafa nâm kimesne mahzarında ikrâr ve takrîr-i kelâm edip zevciyyet beynimizde kāim iken târih-i kitâbdan bir sene mukaddem mezbûr İbrahim Efendi’ye cihet-i karz-ı şer‘îden yüz yirmi dört guruş idâne ve teslîm eylediğimde ol dahi yedimden istidâne ve kabz ve kendi mesârifine sarfla istihlâk etmekle meblağ-ı mezbûru merkūm İbrahim Efendi’den taleb ve da‘vâ eylediğimde ol dahi ba‘de’l-inkâr beynimize muslihûn tavassut edip da‘vâ-yı mezkûremden beni mezbûr İbrahim Efendi ile on beş guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr on beş guruşu mezbûr İbrahim Efendi yedinden ahz u kabz eylediğimden sonra mâ‘adâsı olan yüz dokuz guruşa müte‘allika âmme-i da‘vâdan mezbûr İbrahim Efendi’nin zimmetini ibrâ-i âm ile ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 Cumâdelâhire sene [1]143. Şuhûdü’l-hâl: es-Seyyid Abdülmümin Çelebi b. es-Seyyid Ahmed, Molla Ali b. Osman, Halil b. Yusuf, Kādızâde İbrahim b. Mustafa, Mehmed Çelebi b. Abdullah, es-Seyyid Ali Çelebi b. ( ), Abdullah Çelebi b. Mustafa, Salih Çelebi b. Süleyman.