Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 247 Hüküm no: 230 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Türkmen tâifesinden Yakub b. el-Hâc Ömer ile Bursa’da kassam-ı askerî olan Osman Efendi’nin aralarındaki alacak davasında sulh oldukları Sulh. Mahmiye-i İstanbul’da Vâlidehanı’nda müsâfiren sâkin Türkmen tâifesinden Ya‘kub b. el-Hâc Ömer nâm kimesne meclis-i şer‘-i hatîr-i lâzımü’t-tevkīrde bin yüz otuz dokuz senesinde medîne-i Bursa’da kassâm-ı askerî olan hâfızü’l-kitâb fahrü’l-müderrisîni’l-kirâm Osman Efendi b. el-müvellâ el-müfahham Abdullah Efendi mahzarında ikrâr-ı tâm ve takrîr-i kelâm edip müşârun-ileyh Osman Efendi sene-i mezbûrede medîne-i mezkûrede kassâm-ı askerî iken babam el-Hâc Ömer b. el-Hâc Süleyman târih-i mezbûrda vefât edip mezbûr Osman Efendi terekesini tahrîr ve hâric ez-defter bi-gayr-ı hakkın yüz seksen guruş ile yüz guruş kıymetli bir kula kısrağımı gasben ahz u kabz etmekle meblağ-ı mezbûr yüz seksen guruş ile mârru’z-zikr kısrağın aynı mevcûd ise aynını müstehleke ise kıymet-i şer‘iyyesini müşârun-ileyh Osman Efendi’den taleb ve da‘vâ eylediğimde müşârun-ileyh Osman Efendi inkâr etmekle ben dahi müdde‘âmı isbât sadedinde olup beynimizde nizâ‘-ı küllî cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden beni an-inkâr müşârun-ileyh Osman Efendi ile yirmi guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr yirmi guruşu mûmâ-ileyh Osman Efendi yedinden tamamen ahz u kabz edip husûs-ı mezbûra müte‘allika âmme-i da‘vâ ve kâffe-i mütâlebâtdan müşârun-ileyh Osman Efendi’nin zimmetini ibrâ-i âm ile ibrâ ve iskāt eylediğimde ol dahi bedel-i sulh deyü bana medfû‘u olan meblağ-ı mezkûra müte‘allika âmme-i da‘vâdan benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 13 Cumâdelâhire sene [1]143. Şuhûdü’l-hâl: Hüseyin Efendi b. Mehmed, Mehmed Ağa b. Mehmed kethüdâ-yı muhzırân, Mehmed Çelebi b. Abdullah tahtacı, Kādızâde İbrahim Çelebi b. Mustafa.