Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 352 Hüküm no: 609 Orijinal metin no: [58a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Râbia bt. Ali’ye babasından kalan ev yerinin satışı Budur ki Mahrûse-i Üsküdar sâkinelerinden Râbia bt. Ali nâm hâtun tarafından vekîl-i şer‘î olan Hacı Mehmed Bey el-cündî mahfil-i kazâda Davud b. Hüseyin mahzarında takrîr-i da‘vâ edip Hasan Ağa mahallesinde vâki‘ bir cânibi Murad Halîfe mülkü ile ve bir cânibi Hüseyin mülkü ile ve bir cânibi ( ) ve bir cânibi tarîk-i âm ile mahdûd olan ev yeri müvekkilem mezbûre Râbia’nın babası Ali’nin olup vefât ettikde mezbûreye intikāl etmiş iken mezbûr Davud fuzûlî tasarruf eder vekâletim hasebiyle taleb ederim dedikde gıbbe’s-suâl mezbûr Davud zikr olunan hudûd ile mahdûd olan yeri bundan akdem vefât eden Mahmud Bey vâlidem Ayşe’nin olup vefât ettikde bana intikāl eyledi deyu bey‘ eyledi deyu cevâb verdikde udûl-i müslimînden Seyyid Halil b. es-Seyyid İbrahim ve Mehmed Bey el-cündî edâ-yı şehâdet-i şer‘iyye edip zikr olan yeri mezbûr Mahmud’un vâlidesi mezbûre Ayşe oğlum Ali’nin olup vefât ettikde kızı Râbia’ya intikāl eylemişdir bey‘ edip cihâzına sarf ederim der idi nice def‘a ağzından işittik dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ olup mâ vaka‘a bi’t-taleb tahrîr olundu. Şuhûdü’l-hâl: Hasan b. Sâdık, Muttalib b. Süleyman, Hasan b. Hamza ve gayruhüm