Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 248 Hüküm no: 231 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emrullah b. İbrahim ile Ahmed b. Mehmed’in aralarındaki davada sulh oldukları Sulh. Mahmiye-i İstanbul’da Yedikule dâhilinde sâkin Emrullah b. İbrahim nâm şâbb-ı emred meclis-i şer‘-i şerîfde bâ‘isü hâze’l-kitâb Ahmed b. Mehmed nâm şâbb-ı emred muvâcehesinde ikrâr ve takrîr-i kelâm edip mezbûr Ahmed târih-i kitâbdan üç buçuk sene mukaddem hâl-i sıgārında mahmiye-i mezbûre[de] Silivrikapısı hâricinde Balıklı Ayazma nâm mahalde bi-gayr-ı hakkın benim dahi hâl-i sıgārımda taş ile sağ gözüm üzerine darb ve ondan nâşî zikrolunan sağ gözümün ziyâsı zâil ve amelden kalıp hâlâ her birimiz bâliğ ve reşid olmamız ile mûceb-i şer‘îsini mezbûr Ahmed’den taleb ve da‘vâya tasaddî eylediğimde ol dahi inkâr etmeğin ben müdde‘âmı isbât sadedinde iken beynimize muslihûn tavassut edip da‘vâ-yı mezkûremden beni mezkûr Ahmed ile an-inkâr otuz beş guruş üzerine inşâ-i akd-i sulh eylediklerinde ben dahi sulh-ı mezbûru kabûl ve bedel-i sulh-ı merkūm otuz beş guruşu merkūm Ahmed yedinden tamamen ahz u kabz eylediğimden sonra ben husûs-ı mezkûra ol dahi bedel-i sulh-ı merkūma müte‘allika âmme-i da‘vâ ve mütâlebâtdan ve muhâsamâtdan her birimiz âharı ibrâ-i âmm-ı râfi‘u’l-hısâm ile ibrâ ve iskāt eyledik min-ba‘d husûs-ı mezkûra müte‘allika birbirimiz ile kat‘â da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 15 Cumâdelâhire sene [1]143. Şuhûdü’l-hâl: Mehmed Ağa b. el-Hâc Ahmed, Mehmed Ağa b. Ali Kapudân, Mustafa Ağa b. Mehmed, Mehmed Ağa b. Ahmed, Mehmed b. Receb, Mehmed Çelebi b. Abdullah, Mustafa Çelebi b. İbrahim.