Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 249 Hüküm no: 232 Orijinal metin no: [49b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Ahmed ile İsmail Efendi b. Abdullah’ın katiplik cihetinin ferağı dolayısıyla olan alacak davalarında sulh oldukları Mahmiye-i İstanbul’da Molla Gürânî Mahallesi sâkinlerinden Mehmed Çelebi b. Ahmed nâm kimesne meclis-i şer‘-i hatîr-i lâzımü’t-tevkīrde bâ‘isü hâzihi’l-vesîka İsmail Efendi b. Abdullah nâm kimesne mahzarında takrîr-i kelâm ve bast-ı merâm edip mahmiye-i mezbûrede Kemânkeş Kara Mustafa Paşa Vakfı’ndan Parmakkapı kurbünde vâki‘ vakf-ı mezbûrdan almak üzere bâ-berât-ı âlîşân mutasarrıf olduğum yevmî sekiz akçe vazîfe ile hâfız-ı kütüb cihetini mezbûr İsmail Efendi’ye iki yüz guruş bedel mukābelesinde ferağ ve kasr-ı yed ol dahi kabûl ve üzerine berât ettirip lâkin bedel-i merkūmun yüz altmış guruşunu mezbûr İsmail Efendi yedinden ahz u kabz edip kırk guruşu bâkī kalmağla meblağ-ı mezbûru da‘vâya tasaddî eylediğimde ol dahi teberru‘an mâlından bana yirmi guruş def‘ ve teslîm ben dahi ahz u kabz edip husûs-ı mezbûra müte‘allik [50a] âmme-i da‘vâdan ben mezbûr İsmail Efendi’nin zimmetini ibrâ-i âm ile ibrâ ve iskāt eylediğimde ol dahi bana medfû‘u olan meblağ-ı mezbûra müte‘allika âmme-i da‘vâdan benim zimmetimi ibrâ-i âm ile ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 16 Cumâdelâhire sene [1]143. Şuhûdü’l-hâl: Ömer Çelebi b. İbrahim, Sarrac İsmail Çelebi b. Abdullah, Mustafa b. Yusuf, İbrahim b. Ahmed, Mehmed b. Ahmed duhânî, Mustafa b. Mehmed, Mehmed Çelebi b. Abdullah tahtacı.