Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 249 Hüküm no: 233 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye Hanım bt. Mustafa’nın evini Mustafa Odabaşı b. el-Hâc İbrahim’e sattığı Mübâya‘a, bâ-imzâ-i hazret-i efendi. Husûs-ı âti’l-beyânın mahallinde ketb ü tahrîri için savb-ı şer‘-i enverden bi’l-iltimâs irsâl olunan olunan Mevlânâ Hâfız İbrahim Efendi b. Abdulkādir Mahmiye-i İstanbul’da Sarı Nasuh Mahallesi’nde sâkine fahrü’l-muhadderât Rukiye Hanım bt. Mustafa b. Mehmed’in menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî ettikde mezbûre Rukiye Hanım tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân İbrahim b. Ahmed ve Mustafa b. Ebûbekir nâm kimesneler şehâdetleriyle şer‘an sâbit olan el-Hâc Yusuf Ağa b. Abdullah nâm kimesne meclis-i ma‘kūd-ı mezkûrda işbu sâhibü’l-kitâb Mustafa Odabaşı b. el-Hâc İbrahim mahzarında bi’l-vekâle ikrâr ve takrîr-i kelâm edip müvekkilem mezbûre Rukiye Hanım akd-i âti’z-zikrin sudûruna değin yedinde mülkü olup işbu derûnunda akd-i meclis-i şer‘-i şerîf olunan bir tarafdan kendinin âhar mülkü ve bir tarafdan tarîk-i hâs ve iki tarafdan tarîk-i âm ile mahdûd fevkānî bir bâb oda ve ber-vech-i muharrer müvekkilem mezbûrenin âhar mülkü tarafından müşterek taş duvarı müştemil mülk menzili cümle tevâbi‘ ve levâhıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr Mustafa Odabaşı’ya dört yüz altmış guruşa bey‘ ve temlîk ve teslîm eyledikde ol dahi ber-vech-i muharrer iştirâ ve temellük ve tesellüm eyledikden sonra semeni olan meblağ-ı mezbûr dört yüz altmış guruşu mezbûr Mustafa Odabaşı yedinden tamamen ahz u kabz eyledi min-ba‘d menzil-i mahdûd-ı mezkûrda müvekkilem mezbûrenin kat‘â alâka ve medhali kalmayıp mezbûr Mustafa Odabaşı’nın mülk-i müşterâsı ve hakk-ı sırfı olmuşdur. Keyfemâ-yeşâ ve yahtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ba‘dehû ma‘an ba‘s olunan ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 10 Cumâdelâhire sene [1]143. Şuhûdü’l-hâl: es-Seyyid Mustafa Ağa b. Ali, Yusuf Çavuş b. Osman, Kırkkiliseli Yusuf b. Abdullah, Vekîl-i harc Yusuf Ağa b. Abdullah, Hasan Beşe b. Abdullah, el-Hâc Mustafa b. Musa, Berber el-Hâc İbrahim b. Mustafa, İbrahim b. Ahmed, Mustafa b. Ebûbekir.