Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 362 Hüküm no: 632 Orijinal metin no: [60a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şemme Hâtun bt. Mehmed Efendi’nin, evlerini Dimitri v. Siryani’ye sattığı Mahmiye-i Kostantıniyye -sânehallâhu ani’l-beliyye-de merhûm ve magfûrun-leh Sultân Mehmed Câmii kurbunda mütemekkin fahrü’l-muhadderât zahrü’l-mestûrât Şemme Hâtun bt. Mehmed Efendi tarafından husûs-i âtîye nehc-i şer‘î üzre vekâleti sâbite olan hâlâ Haleb’de alaybeyi olan fahrü’l-emâsil ve’l-akrân Hüsrev Bey b. Abdurrahman mahfil-i kazâda işbu mahmiye-i merkūmede Tahta Minâre kurbunda sâkin Dimitri v. Siryani nâm zimmî mahzarında ikrâr ve takrîr-i merâm kılıp müvekkilem merkūme Şemme Hâtun’un mahrûse-i Üsküdar’a tâbi‘ Kuzguncuk’dan bedrü’l-vüzerâ ve zahrü’l-küberâ Mehmed Paşa -yesserallâhu lehû mâ yurîd ve mâ yeşâ- mülküyle ve deryâyla ve tarîk-i âmla ve Ezkiya v. Moha mülküyle mahdûd olup fevkānî üç evi ve dehliz ve tahtânî iki evi ve bir sofayı ve müsterâhı ve havluyu müştemil mülk menzilini mezbûr Dimitri’ye iki yüz bin ve elli bin akçeye bey‘-i bâtt-ı sahîh-i şer‘î birle bey‘ edip kabz-ı semen ve teslîm-i mebî‘ kıldı ve ben dahi mebî‘-i mezbûrun derkine kefîl oldum dedikde mukırr-ı mezbûrun vech-i meşrûh üzre vâki‘ olan ikrârını mukarrun lehü’l-merkūm vicâhen ikrâr eylediği kayd olundu. Şuhûdü’l-hâl: Mehmed b. Mahmud el-cündî, el-Hâc Mehmed b. Murad, İbrahim b. Mehmed el-imâm, Mehmed b. İbrahim, Mehmed b. Mahmud, Mehmed b. Abdullah, Hasan b. Abdullah, Hasan b. Sâdık, Mehmed b. Kurd, Ahmed Bey b. Mehmed ve gayruhüm