Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 364 Hüküm no: 637 Orijinal metin no: [60b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Lütfi bt. Yahşi’nin boşandığı kocasından nafaka davasından men edildiği Budur ki Mahrûse-i Üsküdar sâkinelerinden Lütfi bt. Yahşi nâm hâtun tarafından da‘vâya vekîl olup vekâleti nehc-i şer‘î üzre sâbite olan Mustafa b. İsmail nâm kimesne mahfil-i kazâda mezbûre Lütfi’nin sâbıkan zevci olan Mustafa b. Murad nâm kimesne mahzarında takrîr-i da‘vâ edip müvekkilem mezbûre Lütfi’nin mezbûr Mustafa zimmetinde iki bin akçe nikâh ve nafaka-i iddeti vardır vermede inâd eder taleb ederim dedikde gıbbe’s-suâl merkūm Mustafa cevâb verip mezbûre Lütfi’ye sâbıkan talâk verdiğimde iki bin akçe nikâhda ve nafaka-i iddetinden ve sâir zevciyyete müte‘allik da‘vâdan fâriğ olmak üzre hul‘a Bâli b. Halil nâm kimesneyi vekîl edip mezbûr dahi meclis-i şer‘a vekâleti isbât edip minvâl-i mezbûr üzre vaz‘ eyledi ve yedimde hüccet-i şer‘iyyem dahi vardır deyu hüccet-i şer‘iyye ibrâz ettikde vekîl-i mezbûr müvekkilem mezbûre Lütfi nikâhından ve nafaka-i iddetinden fâriğ olmak üzre mezbûr Bâli’yi vekîl eylediğini beyân eylesin dediği yedinde olan hüccet-i şer‘iyyede ismi mastûr ve mukayyed olan Hasan b. Ahmed ve diğer Hasan b. Bâli nâm kimesne mahfil-i kazâda edâ-yı şehâdet-i şer‘iyye edip fi’l-hakīka mezbûre Lütfi iki bin akçe nikâhından ve nafaka-i iddetinden ve sâir zevciyyete müte‘allik da‘vâ ve nizâ‘dan fâriğa olmak üzre merkūm Bâli’yi vekîl edip mezbûre Bâli dahi minvâl-i merkūm üzre mezbûr Mustafa’nın vekîli Receb ile hul‘ eylediler bu husûsa şâhidleriz şehâdet ederiz dediklerinde ba‘de ri‘âyet-i şerâiti’l-kabûl hayyiz-i kabûlde vâki‘ oldukdan sonra vekîl-i mezbûr Mustafa mu‘ârazadan men‘ olunup ve mâ hüve’l-vâki‘ tahrîr olundu. Şuhûdü’l-hâl: Şaban Efendi el-kadı, Mustafa b. Mehmed, İsa Efendi el-müderris, Mehmed b. Behrâm ve gayruhüm Yevmü’l-erbi‘â fî 11 Zilka‘deti’ş-şerîfe sene elf