Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 250 Hüküm no: 234 Orijinal metin no: [50a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi b. Osman’ın vefât eden Mustafa b. Mehmed’e olan borcunu müteveffânın vârisi olduğunu ispat eden Havva bt. Mehmed’e ödemeye tenbih olunması İsbât-ı verâset. Mahmiye-i İstanbul’da Altımermer kurbünde Seydî Ömer Mahallesi’nde sâkin iken bundan [-akdem] katîlen vefât eden Mustafa b. Mehmed b. Abdullah b. Ahmed ber-vech-i âtî vârisi olduğu[nu] iddi‘â eden işbu hâfızatü’l-kitâb Havvâ bt. Mehmed nâm hatun meclis-i şer‘-i şerîf-i enverde Hasan Çelebi b. Osman nâm kimesne mahzarında üzerine da‘vâ ve takrîr-i kelâm edip ben müteveffâ-i mezbûr Mustafa’nın babası mezbûr Mehmed ile li-ebeveyn karındaşlar olup babamız ismi Abdullah ve ceddimiz ismi Ahmed ve vâlidemiz ismi Fâtıma bt. İsmail ve maskat-ı re’simiz Aksaray kurbünde İğciler Mahallesi’dir müteveffâ-i mezbûr Mustafa’nın verâseti bana münhasıra olup benden gayrı vâris ve terekesine müstahik âhar olmamağla müteveffâ-i merkūmun mezbûr Hasan Çelebi zimmetinde cihet-i deyn-i şer‘îden on beş guruş hakkı olup kable’l-ahz ve’l-istîfâ fevt olmağla meblağ-ı mezbûr irsen bana isâbet ve intikāl etmişdir. Hâlâ merkūm Hasan Çelebi’ye suâl olunup meblağ-ı mezbûru bana edâya tenbîh olunmak matlûbumdur dedikde gıbbe’s-suâl mezbûr Hasan Çelebi cevâbında fi’l-vâki‘ müteveffâ-i mezbûr Mustafa’ya cihet-i deyn-i şer‘îden on beş guruş zimmetinde edâsı lâzım deyni olduğunu ikrâr lâkin müdde‘iyye-i mezbûrenin ber-vech-i muharrer verâsetini inkâr edicek müdde‘iyye-i mezbûreden müdde‘âsına mutâbık beyyine taleb olundukda udûl-i ahrâr-ı ricâl-i Müslimînden olup mahalle-i mezbûrede sâkin Yusuf Çelebi b. Abdullah ve Abdi Çelebi b. Mustafa nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-hakīka işbu müdde‘iyye-i mezbûre Havvâ Hatun müteveffâ-i mezbûr Mustafa’nın babası Mehmed ile li-ebeveyn karındaşlar olup babaları ismi Abdullah ve cedleri ismi Ahmed ve anaları ismi Fâtıma bt. İsmail ve maskat-ı re’sleri Aksaray kurbünde İğciler Mahallesi’dir müteveffâ-i mezbûr Mustafa’nın verâseti işbu müdde‘iyye-i mezbûre Havvâ Hatun’a münhasıra olup bundan gayrı vâris ve terekesine müstahik âhar olduğu ma‘lûmumuz değildir biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eyledikde gıbbe’t-ta‘dîl ve’t-tezkiye şehâdetleri makbûle olmağın mûcebince ba‘de’l-hükm ve’t-tenbîh mâ-vaka‘a bi’t-taleb ketb olundu. Fî 16 Cemâziyelâhir sene [1]143. Şuhûdü’l-hâl: Mehmed Çelebi b. Abdullah tahtacı, Mehmed Efendi b. İbrahim, İbrahim Çelebi b. Mustafa, Ya‘kub b. Abdullah, Ahmed b. Şa‘ban.