Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 368 Hüküm no: 645 Orijinal metin no: [61a-5] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kefîl olma Budur ki Dergâh-ı âlî çavuşlarından kıdvetü’l-akrân Ali Kaya Çavuş b. Süleyman ve Hüseyin Bey b. Mehmed e’z-Zaîm ve Hasan Bey b. Ali eş-Şehîr bi Ağa Bey ve Musli Çelebi b. Abdullah ve Elbistan alaybeyi fahrü’l-akrân Himmet b. Müdâm nâm kimesneler mahfil-i kazâda bâ‘isü’l-hurûf Hanefi Efendi b. Sarı mahzarında ikrâr ve takrîr-i kelâm edip mezbûr efendiden bir gümüşlü raht ve bir donluk serâser ve bir altınlı yastık ve bir elmâsi hâre kaftan bu cümleyi on beş bin altı yüz nakd râyic fi’l-vakt akçeye aldık târih-i kitâbdan doksan gün tamâmına değin edâ etmek üzre ve birbirimizin zarar-ı mâlına kefîl dahi olduk târih tamâm oldukda müşârunileyh efendi meblağ-ı mezbûru her hangimizden dilerse ondan alâ deyu zikr olunan esbâbı mahkeme-i şerîfede alıp kabz ettiklerinde mukırrân-ı mezbûrunun vech-i meşrûh üzre vâki‘ olan ikrârlarını mukarrun lehü’l-merkūm vicâhen ve şifâhen tasdîk ettikden sonra mâ vaka‘a bi’t-taleb tahrîr olundu. Tahrîren fi’l-yevmi’s-sâlis aşer min şehri Zilka‘de sene elf. Şuhûdü’l-hâl: Hasan Bey b. Çalabverdi el-cündî, Mehmed b. Ali Kaya, Ali b. Maksud, Mehmed b. Behrâm ve gayruhüm