Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 251 Hüküm no: 235 Orijinal metin no: [50b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Paşa sancağındaki Katraniçe mukataasını es-Seyyid Mustafa Ağa’ya iltizam eden Hasan Ağa b. Mustafa’nın parasını aldığı Mahrûse-i Galata kazâsına tâbi‘ kasaba-i Kasımpaşa’da Câmi‘-i kebîr Mahallesi’nde sâkin umdetü’l-eşbâh Hasan Ağa b. Mustafa nâm kimesne meclis-i şer‘-i şerîf-i enverde bâ‘isü hâze’l-kitâb fahrü’l-a‘yân es-Seyyid Mustafa Ağa mahzarında ikrâr ve takrîr-i kelâm edip vilâyet-i Rumeli’de Paşa sancağında vâki‘ Katraniçe ve tevâbi‘i mukāta‘ası bâ-berât-ı âlîşân tasarrufumda olmağla mukāta‘a-i mezkûreyi [bin] yüz kırk bir ve yüz kırk iki senelerinde bin dokuz yüz guruşdan cem‘an üç bin sekiz yüz guruşa der-uhde ve ilzâm ol dahi ber-vech-i muharrer iltizâm ve kabûl ve bedel-i mezkûr üç bin sekiz yüz guruşu mûmâ-ileyh es-Seyyid Mustafa Ağa yedinden tamamen ahz u kabz eylediğimden sonra husûs-ı mezkûre ve târih-i kitâba gelince beynimizde cereyân eden ahz u i‘tâya müte‘allika âmme-i da‘vâdan ben mûmâ-ileyh es-Seyyid Mustafa Ağa’yı ibrâ-i âmm-ı râfi‘u’l-hısâm ile ibrâ ve iskāt eylediğimde ol dahi ber-vech-i muharrer beni ibrâ-i âm ile ibrâ ve iskāt eyledi min-ba‘d birbirimiz ile vechen mine’l-vücûh da‘vâ ve nizâ‘ ve husûmetimiz yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 16 Cemâziyelâhir sene [1]143. Şuhûdü’l-hâl: Za‘îm Ömer Ağa b. Halil, es-Seyyid Mehmed Ağa b. Ali, el-Hâc Mehmed Ağa b. el-Hâc Halil, el-Hâc Süleyman b. Kapudan Mustafa, Mehmed Bey b. Veli, el-Hâc Halil b. Mustafa, Ali Ağa b. Hüseyin, Mustafa Ağa b. Hasan, Hısn-ı Mansûrî Mustafa Efendi, Sinan Kapudânzâde Mehmed Çelebi, umdetü’l-a‘yân Kapıcıbaşı Mehmed Ağa, el-Hâc Süleyman b. Ali, Abdi Beşe b. Hüseyin.