Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 374 Hüküm no: 657 Orijinal metin no: [62a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgo v. Kosta’nın, Nika v. Minho’nun atını izinsiz aldığını ispatlayamadığı Oldur ki Nika v. Minho nâm zimmî mahfil-i kazâda bâ‘isü’l-kitâb Yorgo v. Kosta nâm zimmî mahzarında takrîr-i da‘vâ edip bundan akdem mezbûr Yorgo’nun sâkin olduğu yere bir bârgîr bağlayıp ben anda değil iken zikr olunan bârgîri alıp âhar yere gitmiş hâlâ bârgîr gāibdir suâl olunup vukû‘ı üzre sicil olunmasın taleb ederim dedikde gıbbe’s-suâl mezbûr Yorgo fi’l-hakīka merkūm Nika bârgîrini bağladı lâkin alıp gitmedim deyu inkâr edip mezbûr Yorgo yemînden nükûl eyledikden sonra zikr olunan bârgîrin kıymetini merkūm Nika dahi zikr olunan bârgîrin kıymetini târih-i kitâbdan üç gün tamâmına değin isbât etmezsem meblağ-ı mezbûru merkūm Yorgo’ya teslîm olunup bir def‘a dahi da‘vâ etmemeyim deyip müddet tamâm olup isbâta kādir olmayıp bir def‘a dahi mahkemeye gelmeyecek meblağ-ı mezbûr yine merkūm Yorgo’ya teslîm olunup ve mâ hüve’l-vâki‘ bi’t-taleb tahrîr olunup yed-i tâlibe vaz‘ olundu ki lede’l-hâce müzekkir-i mâ-cerâ ola. Tahrîren fi’l-yevmi’s-sâmin aşer min şehri Zilka‘deti’l-harâm li sene elf. Şuhûdü’l-hâl: Hasan b. Sâdık, Mehmed b. Behrâm, Hüseyin b. Behrâm, Muttalib b. Süleyman ve gayruhüm mine’l-hâzırîn