Üsküdar Mahkemesi 84 Numaralı Sicil (H.999-1000/ M.1590-1591) cilt: 10, sayfa: 374 Hüküm no: 658 Orijinal metin no: [62b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe Hâtun bt. Ferruh Kethüdâ’nın, Ayşe bt. Hızır’a sattığı cariyeden alacaklı olduğu Fahrü’l-muhadderât Ayşe Hâtun bt. Ferruh Kethüdâ tarafından Abdülcelîl Halîfe b. Şuayb ve el-Hâc Abdurrahman b. Abdullah şehâdetleri ile vekâleti sâbite olan fahrü’l-emâsil ve’l-akrân erbâb-ı tîmardan Veli b. Hasan mahfil-i kazâda zahrü’l-mestûrât diğer Ayşe Hâtun bt. Hızır tarafından husûs-ı âtîye yine şâhidân-ı mezbûrân şehâdetleri ile vekâleti sâbite olan kıdvetü’l-a‘yân Sünbül Ağa et-Tavâşî mahzarında ikrâr ve takrîr-i merâm ve takrîr-i kelâm edip mâdem ki mezbûre Ayşe bt. Hızır kırk bin akçeye bir câriyesin mezbûre Ayşe’ye bey‘ edip on bin akçesin alıp hâlâ kabz ettim bâkī otuz bin akçesin târih-i kitâbdan altmış gün tamâmına değin vericek oldu deyip ve Mustafa Çelebi b. Mehmed meblağ-ı mezbûrun on beş bin akçesine kefîl bi’l-mâl oldum deyip ve Mustafa b. Ali nâm bevvâb-ı sultânî dahi kalan on beş bin akçenin zararına ve mezkûr Mustafa Çelebi b. Mehmed’in nefsine kefîl oldum deyicek mukırrûn-ı mezbûrunun vech-i meşrûh üzre vâki‘ olan ikrârını mukarrun lehü’l-merkūm vicâhen ve şifâhen tasdîk ettikden sonra sûret-i hâl gıbbe’l-ibtigā tahrîr olundu. Tahrîren fi’l-yevmi’s-sânî aşer min şehri Zilka‘deti’l-harâm li sene elf. Şuhûdü’l-hâl: Mehmed b. Üveys, Mehmed Çelebi b. el-Hâc Hamza, Müstedâm Bey b. Abdullah el-cündî, Yahya Bey b. el-Hamzavî, Kâtibü’l-hurûf Mehmed Çelebi b. Hacı, Mehmed b. Behrâm, Mustafa b. Mehmed Derkenar: Bu mahkûk olan tashîh olunmuşdur tereddüd olunmaya. Derkenar: Müsveddede kalmağın bu mahalle nakl olundu.